Портпаролката на Белата куќа, Каролин Ливит, во четвртокот вечерта објави дека Израел го одобрил новиот предлог на САД за прекин на огнот, но сè уште не одговорил официјално
Израел го повика палестинското исламистичко движење Хамас да го прифати предлогот на Соединетите Американски Држави (САД) за прекин на огнот во Газа и ослободување на заложниците или ќе биде „збришан“, пренесе ХРТ.
Инаку, Израел се соочува со зголемен меѓународен притисок поради војната во Појасот Газа и хуманитарната ситуација на палестинската енклава, каде што блокадата што траеше повеќе од два месеци, а делумно олесната минатата недела, доведе до сериозен недостиг на храна, лекови и други основни потреби.
Израелската армија неодамна ги интензивираше воените операции во Газа со цел да ја преземе контролата врз целата палестинска територија и да ги ослободи преостанатите заложници што сè уште се држат таму.
Израелскиот министер за одбрана, Израел Кац вечерва изјави дека армијата ги продолжува своите операции со полна сила, додека го евакуира локалното население од секоја борбена зона.
„Убијците на Хамас сега ќе мора да изберат: да ги прифатат условите од ‘предлог-договор Виткоф’ за ослободување на заложниците или да бидат збришани“,
рече Кац со референца на предлогот за прекин на огнот од американскиот пратеник за Блискиот Исток, Стив Виткоф.
Портпаролката на Белата куќа, Каролин Ливит, во четвртокот вечерта објави дека Израел го одобрил новиот предлог на САД за прекин на огнот, но сè уште не одговорил официјално.
Нешто подоцна, Басем Наим, еден од протераните лидери на Хамас, за АФП изјави дека предлогот не ги исполнува барањата на движењето, бидејќи како што рече тој во суштина значи продолжување на окупацијата, убивањето и гладувањето во Појасот.
Според извор близок до Хамас, движењето го осудува недостатокот на гаранции во врска со продолжувањето на разговорите за време на примирјето, со цел постигнување траен прекин на огнот.
Сепак Хамас во петок (30 мај) посочи дека спроведува консултации со палестинските сили и фракции во врска со предлогот кој Виткоф им го пренел преку посредници“.
Реагирајќи на ставот на Хамас, израелскиот министер за национална безбедност Итамар Бен Гвир, кој се спротивставува на каков било компромис од почетокот на војната, ја повика владата да ја употреби сета потребна сила за да го елиминира Хамас.