Другите предизвици, според вицепремиерот и министер за транспорт, се од технички аспект и се однесуваат на дислокацијата на постојната инфраструктура која поминува низ овој регион, а е до клучно значење не само за државата, туку и за нејзиното енергетско и телекомуникациско поврзување надвор
На делницата Тетово – Гостивар – Букојчани, која е дел од стратешкиот Коридор 8, се работи со голем интензитет и се изведуваат сериозни инженерски работи, информира вицепремиерот и министер за транспорт Александар Николоски, кој денеска заедно премиерот Христијан Мицкоски, директорот на Јавното претпријатие за државни патишта (ЈПДП), Коце Трајановски, и претставници на конзорциумот „Бехтел и Енка“ извршија увид во градежните работи.
Сепак, на двете делници, едната од Тетово до Гостивар и од Гостивар до Букојчани, има предизвици, поради кои рокот за завршување на трасата е продолжен за две години односно, како што кажа Николоски, таа треба да биде завршена најрано до декември 2029 година.
Главната причина, рече тој одговарајќи на новинарско прашање, е тоа што, според него, претходната влада, предводена од СДСМ и ДУИ, две години немала сработено ништо од проектот.
„За жал морам да кажам дека претходната влада две години немаше сработено ништо. Ова не е мое тврдење, или на премиерот, или на ЈПДП, туку за ова во ноември месец добивме известување од надзорниот инженер кој побара да се продолжи рокот за завршување на проектот за најмалку две години, затоа што мора да се компензираат тие две години коишто се изгубени од претходната влада и ние тука немаме избор освен тоа да го направиме. Така што, ќе одиме на рок до најрано декември 2029 година, што не значи дека нема да се завршуваат проекти и порано, но тоа е крајниот рок“,
рече Николоски.
Тој во три дела ги класифицира предизвиците со кои се соочуваат изведувачите и владата во работата на овој дел од Коридорот 8, а пролонгирањето на рокот поради неажурноста на претходната влада е еден од нив.
Другите предизвици, според вицепремиерот и министер за транспорт, се од технички аспект и се однесуваат на дислокацијата на постојната инфраструктура која поминува низ овој регион, а е до клучно значење не само за државата, туку и за нејзиното енергетско и телекомуникациско поврзување надвор.
„По овој пат поминува една од главните оптички врски за целата држава, не само интерно за државата, туку и она што излегува како меѓународна интернет комуникација и мора да бидеме многу внимателни за да не се случи, не дај Боже, прекин. Понатаму, тука поминува еден од главните далноводи во државата, од којшто зависи снабдувањето со електрична енергија. Секако тука поминуваат телефонски и електрични врски помеѓу општините, поминуваат водоводни и канализациони системи, и исто така на потегот Тетово – Гостивар поминува главниот канал за наводнување на целото Полошко Поле. Така што тоа се сите работи коишто треба да се дислоцираат пред да се влезе во изградба на автопатот“,
рече Николоски.
Ова, како што кажа, се однесува на делот од Тетово до Гостивар, додека за оној од Гостивар до Букојчани кажа дека има олеснителни околности, но и работи кои имаат своја тежина, пред сè што станува збор за планински терен, кој треба целосно да се заобиколи.
„Делницата Гостивар – Букојчани од една страна изгледа потешко, од друга страна е полесно. Полесно е затоа што тука веќе имаме почист терен, помалку објекти и помалку дислокации, а потешко е затоа што сепак се работи за планина, односно се работи за заобиколување на планината Букович и не градиме магистрален пат, туку градиме автопат каде што брзината треба да биде, зависно од делницата, помеѓу 90 и 130 километри на час“,
изјави вицепремиерот и министер за траспорт.
Третиот предизвик, кажа, повторно е поврзан со делот од Тетово до Гостивар, каде има многу натпатници бидејќи од двете страни живее бројно население, а дополнително, како што рече, мора да се одржува во кондиција и постојниот пат поради спојувањето со Маврово и како алтернативен пат за Кичево и за Охрид.
Во делот на цената на изградбата, Николоски кажа оти не верува дека ќе има некакви анекси. Дополнително, одговарајќи на новинарски прашања, рече дека целосно е завршен делот со експропријација на земјиште на делот од Гостивар до Букојчани.
„На седница на влада го усвоивме урбанистичкиот план за вториот дел од делницата. Пред некаде три седници на влада, исто така, се усвои урбанистичкиот план за последниот дел од делницата Прилеп – Битола и врз основа на тоа се прави експропријација и такви отворени прашања немаме, односно обврската на државата е целосно завршена. Се надевам дека во првата половина од следната година делницата Прилеп – Битола, едната лента целосно ќе биде пуштена, а за останатите како ќе има прогрес, така ќе известуваме“,
кажа министерот.
За делот од Гостивар до Букојчани министерот рече дека е битно тоа што тој не може да биде пуштан во употреба дел по дел, туку тоа ќе мора да се направи кога делницата ќе биде целосно изградена.
Директорот на Јавното претпријатие за државни патишта (ЈПДП), Коце Трајановски, изјави дека се обидуваат да го завршат својот дел од работата за „Бехтел и Енка“ да нема пречки и да може да ја планира својата работа.
И тој се осврна на дислокацијата на постојната инфраструктура, што, рече, е обврска на „Бехтел и Енка“.
„Тие (дислокациите) се обврска на ‘Бехтел и Енка’, интензивно работиме заедно за што побрзо решавање на тие дислокации и мислам дека во најбрз можен рок и таму ќе видите многу поинтензивна работа“,
рече Трајановски.
Претставникот на американско-турскиот конзорциум во изјава за медиумите најави уште поинтензивна работа на делницата во текот на летниот период.
„Во оваа пригода сакам да изразам благодарност до проектниот тим за нивните неуморни напори за одржување на безбедносните и стандардите за квалитет и би сакал да се заблагодарам на Јавното претпријатие за државни патишта, Министерството за транспорт и на Владата за нивното партнерство и за нивната посветеност за надминување на сите предизвици, со што се максимизира нашиот напредок. Очекуваме голем напредок во текот на летниот период“,
изјави тој.