„Железничката линија Радомир–Ѓуешево е во функција и по завршување на делницата од Ѓуешево до Деве Баир во должина од 2,5 километри, преку прекуграничен тунел ќе може да се приклучи на мрежата на операторот РСМ“, се вели во соопштението од тамошното Министерство
Не е одложена изградбата на пругата кон Република Северна Македонија. Коридорот 8 е национален приоритет за Бугарија. Ова попладнево го соопштија од бугарското Министерство за транспорт и врски, откако владата во Бугарија вчера донесе одлука за одложување на модернизацијата на делниците Софија–Перник и Перник–Радомир, кои се дел од железничкото поврзување со земјава во рамки на Коридорот 8.
Оттаму оценуваат дека медиумска шпекулација е тврдењето дека Бугарија ја одложува бугарската секција од Коридорот 8.
„Железничката линија Радомир–Ѓуешево е во функција и по завршување на делницата од Ѓуешево до Деве Баир во должина од 2,5 километри, преку прекуграничен тунел ќе може да се приклучи на мрежата на операторот РСМ“,
сее вели во соопштението на бугарското Министерство за транспорт.
Се посочува и дека тамошното Министерство со години прави напори за развој на Коридорот 8, кој го поврзува Јадранското Море со Црното Море преку Албанија, Република Северна Македонија и Бугарија.
Од вкупно 1 220 километри железница, повеќе од половина од нејзината должина – 747 километри, е на територијата на Република Бугарија. Од нив останува да се изградат само 2,5 километри железничка пруга од Ѓуешево до Деве Баир (границата со Република Северна Македонија). Делот е финансиран во рамките на Програмата за транспортна поврзаност 2021–2027 година и ќе биде завршен според распоредот до 2029 година.
За споредба, посочуваат од Министерството, делот што недостасува на територијата на РСМ е приближно 70 километри.
„На 15 јануари 2025 година, согласно утврдената процедура, Бугарија достави до РСМ нацрт-договор за прекуграничен железнички тунел со РСМ, во кој се претпоставува дека страните имаат заедничка цел-изградба на прекуграничен железнички тунел меѓу Република Бугарија и Република Северна Македонија во граничната област, вклучително и преку спроведување на јавна набавка за изградба и надзор на една од страните за неговата изградба, а изградениот објект треба да ги исполни барањата на ЕУ и НАТО за ваков тип инфраструктура. Досега нема официјален одговор од РСМ“,
информира бугарското министерство.
На иницијатива на Бугарија во 2021 година, како што пишува во соопштението, потпишан е Меморандум за разбирање меѓу Република Бугарија, Република Албанија и Република Северна Македонија за соработка во изградбата на одржлива инфраструктура вдолж Коридорот 8 како основа за преговори, фокусирајќи се на инвестициски проекти со највисока додадена вредност за регионот и за координирање и спроведување на напорите и мерките за изградба на врските што недостасуваат меѓу земјите, како и проекти на секоја нивна територија.
Повторно на предлог на Бугарија на 25 ноември 2022 година е усвоена заедничка декларација на Бугарија, Италија, Албанија и Република Северна Македонија со која се потврдува заедничката посветеност и конкретните мерки за изградба на инфраструктурата долж Коридорот во роковите предвидени во насоките за развој на Трансевропската транспортна мрежа.
Министерот за транспорт Александар Николоски, во врска со одлуката на владата на Софија за одложување на реконструкцијата на дел од делниците од бугарска страна денеска рече дека Бугарија испрати јасна политичка порака за нејзината посветеност, односно непосветеност за изградбата на железничкиот Коридор 8.
Посочи дека со жалење ја примиле информацијата за одлуката на бугарската влада со која средствата за реконструкција на железничките делници од Софија до Ѓуешево се пренасочуваат за довршување на т.н. железничкиот автопат „Тракија“ од Софија до Бургас.
Владата во Бугарија вчера донесе одлука за одложување на модернизацијата на делниците Софија-Перник и Перник-Радомир, кои се дел од железничкото поврзување со земјава во рамки на Коридорот 8.