Првиот човек на Судскиот совет, Сашко Георгиев, во интервју за „360 степени“ на МРТ 1, вели дека при изборот на осумтемина судии за скопска апелација, покрај ранг-листата, важен бил и интегритетот на кандидатите, поднесените претставки за нив, барањата за одговорност…
360°: Сакам да ве прашам и за последниот избор на судии за скопска апелација, осуммина избравте – четворица кривичари, четворица во граѓанската област. Дел од реакците беа поврзани со отстапувањата од ранг-листата, односно зошто се избрани и судии што биле пониско рангирани, некои што биле прилично високо не се избрани. Невладината Коалиција „Сите за правично судење“, којашто ја следи работата на Судскиот совет, реагираше дека отстапувањето од ранг-листата повторно сте го направиле без јасно образложение зошто го правите тоа. Кој е вашиот коментар на реакциите?
Георгиев: Мојот коментар најпрвин ќе го дадам во делот на тоа дека овој избор за осумте судии во Апелационен суд Скопје е од 2021 година, значи две и пол години трае овој процес, тоа ќе биде рекорден времеснки период којшто од разни причини, ама најмногу поради спроведувањето на ова постапка за избор согласно со новата методологија за оценување и за избор во повисок суд. Јас велам вака, дека, како го кажавте, дека е перцепција, дека не била запазена ранг-листата, односно дека има недоволно образложение за кои судии се избрани, да, знаеме дека 45-46 кандидати имаа аплицирано за унапредување односно за избор во Апелационен суд во Скопје. Избрани се осум, јас морам да го кажам тоа дека најголем дел се нова генерација на судии коишто беа апликанти за повисок суд, морам да кажам дека во најголем процент станува збор за исклучително добри судии, стојам на тој став и тврдам и гарантирам дека, познавајќи ги судиите, станува збор за исклулително добри судии, судии со интегритет. Е сега, станува збор за осум каде што мора да бидат ограничен бројот – четири беа за граѓанска и четири за кривична материја. Ранг-листата се изготви врз основа на оценувањето на судите како од редот на самите судии, а и од делот на комисијата којашто спроведуваше оценување од страна на Судски совет, па комбинација од овие два резултата се доаѓаше до овие реални резултати. Ако ја следевте оваа седница којашто беше неодамна, јас го кажав своето дека иако наоѓам по мое убедување забелешки во делот на методологијата каде што се дава премногу значање на познавање на странски јазици, познавањето на работа од информатички дел, но состајбата е таква дека тоа е правилник, методологија којашто сме ја прифатиле и иако имаме забелешки, јас лично имам забелешки – ја почитував, според мое убедување тоа е методологија којашто треба да се почитува во дадената ситуација. Во најголем дел, морам да кажам дека и колегите ја почитуваат оваа методологија и се одеше по таа методологија, односно при оваа ранг-листа, е сега, пазете, многу е интересно прашањето во делот на тоа зошто добил мнозинство вториот, а не добил првиот по ранг-листата или, да речеме, како доаѓа да е избран петиот кандидат во однос на четвртиот…“
360°: Еве, на пример, најгласна од засегнатите е судијката Оља Ристова, таа била треторангирана, добила осум гласа, што е мнозинство, но не го добила второто мнозинство – Бандетеровото?
Георгиев: „Ќе дојдеме до Бадентер, сакав да се докажам во овој дел дека, пазете, значи доаѓаме до состојба кога доаѓа до израз интегритетот на судијата, па сега имаме состојби кога некој од овие судии имаат добри резултати, но имаме состојби кога имаме претставки, па барање за одговорност за некој од тие судии, иако реков дека станува збор и стојам на тоа дека во најголем дел од овие судии се исклучително добри. Во делот на ова, како рековме, дека не доби доволно колешката…“
360°: Оља Ристова – доби осум гласа, а од петте од Бадентер доби два „за“ и три „против“, без јасно образложение зошто така гласале особено овие од второ мнозинство. Вие лично сте Влав?
Георгиев: „Така, и јас гласам по Бадентер. Значи, Бадентеровото правило или принцип при одлучување за избор во Советот, па и генерално, ние имаме, тоа ни е уставна категорија, значи тоа е законско решение, каде што е со мотивација, јас тоа така го сфаќам, да бидат застапени националните интереси на помалите етнички заедници и да бидат заштитени на некој начин при вакви состојби, при избори. Во случајот за колешката, доби мнозинство гласови коишто се доволни за да биде избрана, осум гласови согласно законот, за да биде избрана во повисок суд. Со оглед дека станува збор за Град Скопје, односно Апелационен суд Скопје, каде што е предвидено и гласање од страна на Бадентерово мнозинство, имавме состојба каде што колешката не го доби мнозинството од Бадентерово мнозинство. Од кои причини, повторно ќе кажам дека тоа е по лично убедуваање на секој член поединечно.“
360°: Ама треба јавноста да го слушне тоа и да го знае, тоа е прашањето?
„Па се согласувам дека би требало, се согласувам во овој дел, ние сме, на некој начин, во состојба каде што би требало да се каже од кои причини некој гласал или не гласал лично индивидуално во оваа ситуација, секој на своја совест и на своја одговорност.“