Четири лица се здобија со полесни изгореници, откако попладнево удри гром во близина на плажата „Оревче“ (кај Градиште) на Охридското Езеро. На Фејсбук профилот на плажата, споделени се детали од настанот.
Громот удрил на неколку метри од брегот, а среќна околност е што на плажата немало многу гости. Уште утрото бил откажан закажан настап на диџеи, поради најавите за лошо време.
„Почитувани,
Во врска со немилиот настан на плажа Оревче ве известуваме дека, според очевидците, громот удрил во езерото на неколку метри од брегот. Полесно беа повредени неколку гости кои седеа на три до пет метри од водата. Во моментот на громот воопшто немаше невреме или голем дожд, па затоа ништо не навестуваше дека ќе има таков силен удар. Веднаш реагираше спасувачот ангажиран од наша страна преку Црвениот крст Охрид, а да помогнат притрчаа и дел од гостите кои останаа присебни. За неколку минути паниката беше смирена, а неколкумина со лесни изгореници заминаа на лекарски преглед. Со оглед на лошите временски услови денеска на плажата немаше многу гости, а беше откажан и настапот на диџеите. Тимот на Оревче жали за немилиот настан, а на нашите гости им посакуваме брзо закрепнување“,
соопштија од плажата Оревче.
Од Општа болница Охрид велат дека вкупно 13 лица пријавиле тегоби или последици по ударот на гром. Ниту едно од лицата, сепак, не е хоспитализирано, вели директорот на Општа болница Охрид, Горан Балевски, за МИА.
Според д-р Балевски, на сите лица кои се пожалиле на тегоби им е извршен преглед и само кај четворица се констатирани лесни изгореници. Останатите се жалеле на стрес или на проблеми со слухот. По специјалистичкиот преглед сите се пуштени дома.