Кој и да победи, доколку вистински се залага да го заштити јавниот интерес, треба да носи одлуки во полза на сите и да го заштити уставно загарантираното право за здрава животна средина и активното учество на граѓаните во креирањето и донесувањето на одлуките, порача Ивановска
Секој граѓанин кој има право на глас е здраворазумен и има одговорност кому ќе го даде својот глас, порача кандидатката за градоначалничка на Општина Центар, Билјана Ивановска, на денешната прес-конференција заедно со избраните советници од граѓанските иницијативи обединети во платформата „Независни заедно“. Ивановска, за која изборната трка заврши во првиот круг од изборите, кажа дека нема да ги повикува граѓаните кои гласале за неа, да дадат поддршка за еден од двајцата кандидати во вториот круг на локалните избори.
Кој и да победи во битката за градоначалник на Центар, според Ивановска, треба да носи одлуки во полза на сите, доколку вистински се залага да го заштити јавниот интерес.
„Голем број граѓани препознаа вредности и без особени кампањи, затоа што тоа се свесни граѓани кои наместо секојдневно да негодуваат за проблеми, преземаат акција за промени, преземаат одговорност за својот живот. Кој и да победи, доколку вистински се залага да го заштити јавниот интерес, треба да носи одлуки во полза на сите и да го заштити уставно загарантираното право за здрава животна средина и активното учество на граѓаните во креирањето и донесувањето на одлуките,“
кажа Ивановска.
Ивановска додаде дека граѓаните очекуваат одговорни политики и транспарентност во одлуките на локалната власт, укажувајќи на потребата од ревизија и усогласување на Деталните урбанистички планови со Генералниот урбанистички план.
„Укажуваме дека е неопходно да се ревидираат, изменат и дополнат Деталните урбанистички планови, кои не се во согласност со Генералниот урбанистички план. Да не се издаваат дозволи за градба врз основа на Детални урбанистички планови, чии параметри, на пример густина на население, се поголеми од предвидените во Генералниот план. Издадените дозволи да бидат јавно објавени на мапата која што „Шанса за Центар“ доброволно ја направи и ќе ја стави на располагање на Општината, која што ќе треба само да ја одржува. Ние направивме мапа и во моментот има над 150 градби во општина Центар, “
додаде Ивановска.
Ивановска, посочи и на потребата од итни мерки за безбедноста и здравјето на учениците, меѓу кои обезбедување безбедни училишни коридори и воведување редовна физичка активност или пливање за секое дете, особено за оние во социјален ризик. Таа нагласи и дека треба да се преземат мерки за заштита од климатски промени и зачувување на зеленилото, предупредувајќи на последиците од уништувањето на Водно и урбанизацијата околу Вардар.
„Јавно ги повикувам кандидатите да се обврзат дека овие мерки ќе ги применуваат. Нашите советници ќе делуваат конструктивно, ќе соработуваат за сите проекти од интерес на граѓаните, но ќе бидат и гласни критичари за сите сомнителни одлуки,“
порача Ивановска.
Носителката на советничката листа од „Независни заедно“ за Град Скопје, Јана Белчева-Андреевска, најави дека платформата ќе продолжи со собирање потписи за регистрација како граѓанско-политичко здружение.
„Поради нееднаквите услови со кои се соочивме во текот на изборниот процес, поради сите сопки и препреки во последен момент кои што се изнајдоа за учество на граѓаните активно да бидат чинители и креатори на политиката и да учествуваат како независни кандидати и независни листи, поради сета демонизација на противници и поради намалување на демократијата во државата, ние одлучуваме понатаму да продолжиме со собирање на потписи и со регистрирање на граѓанско-политичката платформа „Независни заедно“,
посочи Белчева-Андреевска.
Таа ги повика сите независни групи низ земјата да се приклучат кон иницијативата.
„Сакам да ги повикам сите независни групи низ цела Македонија кои сакаат да бидат дел од оваа платформа на децентрализирано поставени јадра кои ќе делуваат во своите локални средини, но ќе имаат еден сигурен чадор за понатамошен настап на изборите, кои ќе бидат едно јадро на демократски процеси кои ќе почнат полека, но сигурно да го рушат монолитот на политичките партии кои не сакаат да се откажат од позициите на моќ кои ги задржуваат, кои ние гледаме дека не работат во корист на граѓаните. Само вака здружени граѓаните ќе можат полесно да се изборат и да го напукнат монолитот и да го запрат ова 30-годишно опустошување на државата,“
додаде таа.