Претседателката на Државната комисија за спречување корупција (ДКСК) Билјана Ивановска смета дека Јавното обвинителство (ЈО) сè уште работи под притисок од, како што посочи денеска, две причини – првата е тоа што за некои предмети сè уште нема одговори, а втората е дека за некои предмети, пак, добиваат многу брзи одговори. Тоа, според неа, упатува дека се работи за различни нарачки.
„Мислам дека треба уште многу да се работи, прво секој на себе прво, па потоа институционално да се зајакнуваат механизмите за контролно однесување. Ние најавивме дека за наредната година прво судскиот систем ќе биде ставен во годишниот план за проверка и следење на имотната состојба, ќе дадеме свој придонес од наш аспект, согласно нашиот закон и ќе видиме како ќе оди понатаму“, рече Ивановска одговарајќи на новинарско прашање во однос на тоа колку се задоволни од постапката на ЈО кога упатуваат препораки да се поведе кривична одговорност на некој, пред почетокот на обуката за улогата на укажувачите во борбата против корупцијата.
Прашана за тоа колку е доволно следењето на состојбата на судиите и обвинителите во борбата против корупцијата, Ивановска рече дека првиот чекор е дали тие се ажурни, дали доставуваат анкетни листови, како за почеток или за крај на функцијата, но така и за секоја промена што е, како што вели, многу важно и индикативно, потоа дали доставуваат точни податоци и дали има некаков лош размер меѓу нивните примања и нивниот стекнат имот.
– Треба малку поконкретно да се следи целиот проблем, затоа што тука се другите институции, како што е Финансиската полиција и финансиско разузнавање. Доколку ние утврдиме несразмерно зголемување на имотот, тогаш нашите предмети ги доставуваме до овие надлежни институции кои имаат истражни центри и кои подлабоко ги истражуваат случаите, односно како и на кој начин е стекнат имотот и си поднесуваат пријави понатаму. Ние и претходно отворивме предмети за пет судии, кои по нашата обработка ги дадовме понатаму и очекувам дека за скоро време тие ќе бидат завршени“, рече Ивановска.
Во однос на ветингот во правосудството, таа рече дека може да се зборува за најава и за ветинг, но тоа треба добро да се подготви и мора да биде заснован на закон.