Британскиот регулатор соопшти денеска дека оваа вакцина не е причина за згрутчување на крвта
Експертите на агенција за безбедност на вакцини ќе се состанат утре за да разговараат за вакцината на АстраЗенека откако голем број земји престанаа да ја користат поради страв од згрутчување на крвта.
„Советодавниот комитет за безбедност на вакцините на СЗО ги разгледува достапните податоци, тесно соработува со Европската агенција за лекови и ќе се состане утре“,
рече на брифинг со новинарите шефот на СЗО, Тедрос Аданом Гебрејесус.
Европската агенција за лекови, во меѓувреме, соопшти дека ќе одржи „итен состанок“ в четврток за вакцината на „Астра Зенека“, додавајќи дека нејзините придобивки сè уште ги надминуваат ризиците.
ЕМА соопшти дека утре „дополнително ќе ги разгледа информациите“ и „ќе свика вонреден состанок во четврток за да донесе заклучок за собраните информации и за сите дополнителни активности што може да се преземат“.
Регулаторот за лекови за ЕУ ја проверува безбедноста на вакцината против ковид-19 на АстраЗенека, откако извештаите за смртност поради згрутчување на крвта доведоа до прекин на нејзина употреба во повеќе земји.
„Внимателно ги испитуваме сите податоци, особено фаталните случаи што се пријавени“,
рече Марко Кавалери, шеф на стратегијата за вакцинација и закани за здравјето на Европската агенција за лекови, пред здравствениот комитет на Европскиот парламент.
Кавалиери го изјави ова откако Германија соопшти дека ќе престане да ја користи вакцината на „Астра Зенека“, непосредно пред таква одлука да донесат и Франција и Италија.
Но, додека се разгледуваат податоците, Кавалери вели дека ЕМА досега „не гледа проблем во продолжување на кампањата за вакцинација со користење на оваа вакцина“.
Коментарите доаѓаат во ист ден кога најголемите земји-членки на ЕУ се придружија на други земји, како , Данска и Тајланд, во запирање на употребата на вакцината на „Астра Зенека“. Одлуките беа опишани како „мерки на претпазливост“, во очекување на понатамошна анализа дали има причинско-последична врска меѓу вакцината и смртните случаи и други пријавени несакани ефекти кај луѓето по примањето на лекот.
Вакцината на „Астра Зенека“ / „Оксфорд“ не е одговорна за згрутчување на крвта, соопшти денеска британскиот регулатор за вакцини.
Фил Брајан, шеф за безбедност на вакцини во Агенцијата за регулирање на лекови и здравствени производи, изјави дека организацијата „внимателно ги разгледува“ извештаите за згрутчување на крвта во некои европски земји.
Според него, доказите што се на располагање „не сугерираат дека вакцината е причина за тоа“.
„Згрутчување на крвта може да се појави природно и не е невообичаено“,
изјави Брајан.
Повеќе од 11 милиони дози од вакцината на „Астра Зенека“ досега се администрирани низ Велика Британија, а бројот на згрутчување на крвта пријавени по вакцинирањето, како што се наведува, не е поголем од бројот што би се случил природно кај вакцинираната популација.
Францускиот претседател Емануел Макрон денеска изјави дека вакцинацијата ќе престане се додека ЕМА не спроведе нова проценка за тоа дали постои некаква врска меѓу вакцината и пријавените инциденти на згрутчување на крвта.
Италијанскиот регулатор на лекови „Аифа“, исто така, прекинот на вакцинацијата со оваа вакцина низ целата земја го нарече „потег на претпазливост“.
„Астра Зенека“ вчера соопшти дека нема докази дека нивната вакцина против ковид-19 го зголемува ризикот од згрутчување на крвта.