Опозициските партии реагираа луто откако беше откриено дека агенцијата, која беше критикувана во последните недели бидејќи нејзините агенти убија двајца американски државјани во Минеаполис, ќе биде вклучена во безбедносните операции за Игрите, кои започнуваат на 6 февруари
Владата на италијанската премиерка Џорџа Мелони се обидува да ја поправи политичката штета откако Службата за имиграција и царина на САД (ИЦЕ) потврди дека нејзините агенти ќе бидат вклучени во обезбедувањето на Зимските олимписки игри во Италија следниот месец.
Опозициските партии реагираа луто откако беше откриено дека агенцијата, која беше критикувана во последните недели бидејќи нејзините агенти убија двајца американски државјани во Минеаполис, ќе биде вклучена во безбедносните операции за Игрите, кои започнуваат на 6 февруари.
Италијанскиот министер за надворешни работи Антонио Тајани, рече дека нема да бидат истите луѓе што патролираат по улиците на Минеаполис“.
„Бев построг од кој било друг во Италија во овие рации на ИЦЕ… но не е како СС да доаѓа кај нас“,
рече тој.
Контроверзноста избувна во понеделникот кога Атилио Фонтана, претседателот на Ломбардија, погрешно сугерираше дека агентите на ИЦЕ ќе помогнат само во обезбедувањето на американскиот потпретседател Џеј-Ди Венс и шефот за надворешна политика на САД, Марко Рубио, кои треба да присуствуваат на церемонијата на отворањето на 6 февруари на стадионот Сан Сиро во Милано.
ИЦЕ: Сите операции остануваат под италијанска јурисдикција
ИЦЕ потоа се обиде да ја разјасни својата улога.
„На Олимписките игри, Одделот за истраги за внатрешна безбедност (ХСИ) на ИЦЕ ги поддржува дипломатските безбедносни операции на САД и операциите на земјата домаќин во проверката и намалувањето на ризикот од транснационални криминални организации. Сите безбедносни операции остануваат под италијанска јурисдикција,“
се наведува во соопштението на ИЦЕ.
ХСИ, кој е присутен во Италија и бројни други земји, е дел од ИЦЕ, но е одвоен од подагенцијата што во САД се занимава со депортации.
Како и другите делови од федералната влада на САД, ХСИ играше сè поважна улога под администрацијата на Трамп во поддршката на одделот за депортација на ИЦЕ, кој инаку истражува злосторства како што се сексуална експлоатација на деца, трговија со луѓе и сајбер-криминал.
Министерството за внатрешна безбедност на САД не одговори на барањето за коментар дали нови агенти ќе бидат испратени во Милано или Кортина д’Ампецо или дали во операциите ќе учествува само персонал од канцеларијата во Рим.
Критиките се зголемуваат
„Оваа влада е потсмев и целосно потчинета на луѓе како Трамп, кои нè навредуваат секој ден, го загрозуваат светскиот мир и ги оправдуваат нечовечките и криминалните дела како оние што ги извршува ИЦЕ“,
рече Рикардо Ричарди, пратеник на опозициското движење Пет ѕвезди.
Алесандро Зан, член на Европскиот парламент од Демократската партија, ја нарече одлуката неприфатлива.
„Не сакаме во Италија оние што ги газат човековите права и дејствуваат надвор од каква било демократска контрола“,
напиша тој на социјалната мрежа Икс.
Марија Кјара Гада, пратеничка на центристичката партија Италија вива, изјави дека италијанската влада не успеала во безбедносните прашања.
„Ако на италијанската влада ѝ е потребна помош од ИЦЕ, тоа значи не само дека не успеала во безбедносните прашања, туку дека прифатила и опасен правец“,
рече Гада.
И локалните лидери се придружија на критиките. Градоначалникот на Милано, Џузепе Сала, за радио РТЛ 102.5 изјави дека ИЦЕ не е добредојдена.
„Тоа е милиција која убива… Тие не се добредојдени во Милано, нема сомнение за тоа. Не можеме ли само еднаш да му кажеме не на Трамп“,
праша Сала.
Јавниот притисок исто така расте. Две петиции започнати во вторникот веќе собраа повеќе од 50 000 потписи, со кои се бара од владата на Италија да ѝ забрани на ИЦЕ да пристигне и да работи во Италија.