Иако смета дека рокот што ѝ го даде УЕФА за да го прецизира бројот на гледачи кои ќе можат да присуствуваат на натпреварите на ЕП е прекраток, Италија се најде во ситуација или да го прифати или да ја загуби организацијата на натпреварите
Италијанската Влада дозволи присуство на гледачи на натпреварите на претстојното Европско фудбалско првенство кои ќе се играат на Олимпискиот стадион во Рим, соопшти попладнево Фудбалската федерација на Италија (FIGC).
Римскиот стадион „Олимпико“ може да прими 60 000 гледачи, а за натпреварите на Европското првенство (ЕП) властите дадоа „зелено светло“ за присуство на 15 000 гледачи, или, 25 отсто од капацитетот.
„Оваа владина одлука е прекрасна вест што веднаш ќе ја пренесеме во УЕФА“,
порача претседателот на FIGC, Габриеле Гравина.
Првиот човек на италијанскиот Национален здравствен совет Франко Локатели вчера порача дека рокот што УЕФА и го постави на Италија да го прецизира бројот на гледачи кои ќе можат да присуствуваат на натпреварите на ЕП е прекраток. Меѓутоа, Италија се најде во ситуација или да го прифати условот на УЕФА или да ја загуби организацијата на натпреварите.
Рим е еден од 12-те градови домаќини на ЕП, кое ќе биде отворено на „Олимпико“ на 11 јуни со натпреварот меѓу Италија и Турција. На „Олимпико“ ќе се играат и натпреварите Италија – Швајцарија (16 јуни) и Италија – Велс (20 јуни), како и едно четвртфинале.