Италија планира да воведе нови рестриктивни мерки за спречување на ширењето на коронавирусот, по напливот на нови случаи.
Според најавите на италијанскиот министер за здравство Роберто Сперанца, во план е да за се забранат приватните забави, мерка која би важела на национално ниво, додека во Рим би можело да има скратување на работното време на баровите и рестораните.
Како што пишува „Ројтерс“, за пакетот нови ограничувања ќе се дискутира денеска, а уште вечерва премиерот Џузепе Конте би можел да го потпише декретот.
И Германија размислува за евентуално засилување на мерките. Помошник на канцеларката Ангела Меркел, Хелге Браун, вчера изјавил дека треба да продолжат со ограничување на бројот на луѓе на собири, како и да се спречат непотребните патувања.
Браун во изјава за јавниот сервис рекол дека мора да бидат построги во однос на местата и настаните каде се шири ковид-19, а како такви ги посочил забавите и патувањата.
Нови рестрикции денеска се очекува да објави и Велика Британија. Според најавите, во различни региони ќе бидат прогласени нивоа на готовност. Највисоко ниво на тревога евентуално би требало да се прогласи во регионот на градот Ливерпул, кој во моментов е најпогоден од новиот бран. Меѓутоа, дали ова ќе значи карантин или други мерки, засега не е познато. Градоначалникот на Ливерпул Стив Ротерхам во последната изјава посочил дека британската влада сака во тој регион да воведе најстроги мерки, но тие сè уште се дискутираат.