Во истражувањето било утврдено дека вкупниот износ на загубите се зголемил за 56 отсто за само една година, а и бројот на претпријатија што работеле со загуба се зголемил од 54 на 71
Финансиските резултати на локалните јавни претпријатија во Северна Македонија покажуваат тренд на зголемени загуби и огромни долгови, открива истражувањето на Центарот за граѓански комуникации (ЦГК) врз основа на завршните сметки за 2024 година.
На првите три места со најголеми загуби во земјава се три скопски јавни претпријатија – „Водовод и канализација“, „Улици и патишта“ и „Комунална хигиена“, од кои само „Водовод“ има загуба од скоро 4,2 милиони евра.
На четврто и на петто место се две битолски претпријатија, „Водовод“ и „Комуналец“.
Вкупните загуби на 71 претпријатие изнесуваат 17,4 милиони евра, а само првите 10 имаат сума од 13,5 милиони евра.
Од вкупно 128 локални јавни претпријатија, дури 71 или 55 отсто ја завршиле 2024 година со загуба.
Во истражувањето било утврдено дека вкупниот износ на загубите се зголемил за 56 отсто за само една година, а и бројот на претпријатија што работеле со загуба се зголемил од 54 на 71.
Иако помал број претпријатија оствариле добивка во 2024 година, тие биле поуспешни, бидејќи вкупната вредност на остварената добивка е зголемена за 24 проценти и изнесувала 5,4 милиони евра.
Од Центарот за граѓански комуникации велат дека уште поголеми од загубите се долговите на локалните јавни претпријатија, мерени преку нивните краткорочни обврски. Според нивните завршни сметки, дури 126 од 128 локални јавни претпријатија имаат долгови кои вкупно изнесуваат 193,2 милиони евра.
Прв на листата со најголеми долгови и најголема загуба е скопски „Водовод и канализација“. Ова претпријатие има краткорочни обврски од 53,3 милиони евра.
По него следува ЈСП „Скопје“, кое има долгови од речиси 17 милиони евра.
Претпријатијата што следуваат по овие две имаат долгови од речиси 10 милиони евра, а тука се кумановски „Водовод“ и гостиварски „Комуналец“. На петто место, со долгови од 8 милиони евра се наоѓа скопска „Комунална хигиена“.
Првите десет претпријатија со најголеми долгови заедно должат 40 отсто од вкупните долгови на сите претпријатија, а долгот на првите 20 најзадолжени претпријатија изнесува 53 проценти од вкупните долгови.
Истражувањето открило дека една третина од локалните јавни претпријатија имаат блокирана банкарска сметка, односно 41 претпријатие.
Во 2024 година, приходите на јавните претпријатија се зголемиле за 2,7 отсто, додека расходите пораснале двојно повеќе – за пет проценти.
Во однос на работната сила, бројот на вработени е во благ пад, достигнувајќи 12 009 вработени во постојан работен однос, што е за 171 помалку од 2023 година. Најмногу вработени, над илјада, имаат скопските претпријатија „Комунална хигиена“, ЈСП и „Водовод и канализација“.
Од другите градови, претпријатие со најмногу вработени е штипски „Исар“.
