Податоците се објавени во рамките на кампањата за подигнување на свеста за спречување на насилство врз жени кои се занимаваат со политика, под мотото „Заокружи“ НЕ“
Жените политичарки првично се гледат како женски предмет, дали е згодна, дебела, дали има отворено деколте или кратко здолниште, дали има провокативен кармин или маникир, а не што ќе каже, за што е посветена, кого претставува и колку е успешна, вели министерката Јагода Шахпаска
Резултатите од истражувањето спроведено во 2020 година на Националниот демократски институт и Охридскиот институт покажува дека шест од 10, жени во политиката во земјава, или 65% од испитаниците, доживеале некаква форма на насилство.
62% од жените изјавиле дека не пријавиле вакво насилство, бидејќи, иако биле ангажирани во политиката, не им веруваат на институциите.
„Актите на насилство врз жените во политиката имаат за цел да го ограничат и обесхрабрат нивното учество во креирањето политики. Најчестите акти на насилство во Северна Македонија се во форма на говор на омраза, навреди и сексуални закани. 65% од жените политичари изјавиле дека доживеале некакво насилство, додека 5 од 10 жени изјавиле дека ова насилство го вршат членови на партијата на која и припаѓаат. Само 26% од нив изјавиле дека партиите на кои им припаѓаат имаат механизми за подобрување на однесувањето на членовите“
вели Роберт Скот Хестед од НДИ.
Министерката за труд и социјална политика, Јагода Шахпаска рече дека жените во политиката се гледаат по тоа дали е згодна или какво деколте има.
„Жените политичарки првично се гледат како женски предмет, дали е згодна, дебела, дали има отворено деколте или кратко здолниште, дали има провокативен кармин или маникир. Но, треба да се слушне што ќе каже, за што е посветена, кого претставува и колку е успешна. Затоа, притисокот врз жените во политиката е многу поголем од притисокот врз мажите политичари“,
рече Шахпаска.
Податоците се објавени во рамките на кампањата за подигнување на свеста за спречување на насилство врз жени кои се занимаваат со политика, под мотото „Заокружи“ НЕ“.
Целта е да се креира свесност за насилството врз жените во политиката притоа поттикнувајќи солидарност со жените од јавниот живот коишто се соочуваат со вакви предизвици и градејќи политичка култура којашто го поттикнува учеството на жените на сите нивоа на општеството без страв од сексистичка, мизогинистичка или злоупотреба со предрасуди и говор на омраза, заплашување и насилство.