Вилијамс ја започна турнејата во мај, настапувајќи во Единбург, Лондон, Амстердам, Берлин, Хелсинки, Софија и Атина, а беше планирано да ја заокружи со концерт во Истанбул
Британскиот пејач Роби Вилијамс изјави дека градските власти го забраниле неговиот претстоен концерт во Истанбул „во интерес на јавната безбедност“, откако турските невладини организации и корисниците на социјалните мрежи воделе кампања за откажување на настанот и протестирале против неговото појавување.
Концертот требаше да се одржи на 7 октомври – годишнината од катастрофалниот напад предводен од Хамас во Израел пред две години, во кој терористите убија околу 1 200 луѓе и зедоа 251 заложник, предизвикувајќи ја тековната војна во Газа.
„Градските власти го откажаа настапот, во интерес на јавната безбедност. Последното нешто што би сакал да го направам е да ја загрозам безбедноста на моите обожаватели – нивната безбедност и сигурност се на прво место“,
напиша пејачот на Инстаграм.
Компанијата организатор го објави откажувањето на концертот „во согласност со одлуката донесена од канцеларијата на гувернерот на Истанбул“, додавајќи дека враќањето на билетите ќе биде обработено преку платформата каде што се купени.
Британски „Сан“ објави дека концертот е откажан од страв од закани во Турција поради неговата мината поддршка за Израел, каде што имал настапи во минатото.
Вилијамс (51) е во брак со Ајда Филд Вилијамс – чиј татко е Турчин, а мајка ѝ има еврејско потекло.
Тој досега не дал никакви директни изјави за терористичкиот напад врз Израел од 7 октомври 2023 година или за масовниот одговор на Израел во Газа.