Пензионерите и осигурениците можат да бидат спокојни, пензии редовно се исплаќаат и ќе се исплаќаат и во иднина секој први во месецот, велат од ПИОМ
Исплатата на пензиите е стабилна, редовна и загарантирана, реагираат од Фондот за пензиско и инвалидско осигурување по обвинувањата од СДСМ дека власта направи хаос во пензискиот систем и дека во прашање е доведена исплатата на пензиите. Од ПИОМ посочуваат дека банките во текот на вчерашниот ден ја започнаа исплатата на пензиите за ноември и до понеделник, 1 декември, се очекува таа да заврши.
„Пензионерите и осигурениците можат да бидат спокојни, пензии редовно се исплаќаат и ќе се исплаќаат и во иднина секој први во месецот. Исплатата на пензиите не е доведена во прашање, бидејќи Владата ја гарантира истата и не треба да има никаков сомнеж или страв дека пензии нема да има,“
реагираат од ПИОМ.
Во соопштението од ПИОМ велат дека обвинувањата на СДСМ се неосновани и служат единствено за вознемирување на пензионерите и граѓаните.
Додаваат дека буџетот за 2026 година изнесува речиси 151 милијарда денари и е наменет за исплата на пензии, здравствено осигурување на пензионерите и транзициските трошоци кон пензиските друштва од вториот столб.
Во изминатата година, како што се посочува, пензиите биле зголемени линеарно за 6 000 денари за секој пензионер, со што просечната пензија од 21 000 денари во септември 2024 година се зголемила на 27 000 денари во септември 2025 година.
„Покачувањето и линеарното усогласување на пензиите се во насока на подобрување на животниот стандард на пензионерите и намалувањето на влијанието на инфлацијата“,
додаваат од ПИОМ.
На денешната прес-конференција за економските и социјалните проблеми, лидерот на Социјалдемократскиот сојуз (СДСМ), Венко Филипче, кажа дека лошите политики на Владата направија хаос во пензискиот систем со што во ризик ја доведе нивната редовна исплата во следните месеци. Тој посочи и дека премиерот Христијан Мицкоски се обидува со лаги и манипулации, вината за хаосот што тој го направи во пензискиот фонд да ја препише на опозицијата.
„Велат дека СДСМ сака преку судството да ги намали пензиите на пензионерите. Ваква лага одамна не сме слушнале. Сакам јасно да им порачам на пензионерите дека хаосот што се случува во пензискиот систем, нестабилноста на пензискиот фонд, неизвесноста дали воопшто ќе има исплата на редовни пензии во следните месеци, се резултат на лошите политики, на лагите и манипулациите на премиерот Мицкоски и владата на ВМРО-ДПМНЕ, ЗНАМ и ВЛЕН“,
кажа Филипче.