Од Министерството за внатрешни работи (МВР) за „360 степени“ потврдуваат дека случајот вчера ѝ бил пријавен на полицијата во Петровец
Слика од девојка на која е опишан нејзиниот изглед од утрово се шири на социјалните мрежи и се нагласува дека таа е изчезната. Станува збор за девојката Енкеледа Чела која е од Република Албанија, а која во земјава престојувала заради студии.
Според описот на фотографијата станува збор за девојка со црвено-кафена боја на коса, висока 160 сантиметри, тешка 55 килограми, која на горните заби носела протеза. Девојката била облечена во фармерки и црна јакна, а носела и ранец.
Фотографијата на Фејсбук е објавена од профилот на Јоана Манојловска која вели дека е другарка на исчезнатата девојка.
„Се бара Ени, другарка ми. (Енкеледа Чела, 21 година). Ве молам споделете“,
пишува во објавата на Јоана.
На фотографијата, исто така е нагласено дека девојката последен пат била видена вчера наутро на бензинската пумпа во населбата Илинден.
Од Министерството за внатрешни работи (МВР) за „360 степени“ потврдуваат дека случајот вчера ѝ бил пријавен на полицијата во Петровец.
„На 30.03.2024 во 10:30 часот во ПО ‘Петровец’ Г. Т. пријавила дека Е. Ч. (20) од Република Албанија се оддалечила од домот во Скопје каде престојува. Се преземаат мерки за пронаоѓање на лицето“,
се вели во информацијата од МВР.