Мартин денеска требаше да учествува со американскиот претседател на традиционалните свечености на Денот на свети Патрик во Белата куќа и на Капитол Хил
На ирскиот премиер Михаил Мартин синоќа во Вашингтон му била потврдена инфекција со коронавирус, што ги искомплицирала плановите тој денеска да се појави заедно со американскиот претседател Џо Бајден на церемонијата по повод Денот свети Патрик во Белата куќа.
Мартин синоќа присуствувал на ирската свеченост во Националниот музеј на градот Вашингтон, на која зборувал американскиот претседател, но претставник на Белата куќа соопшти дека двајцата не се нашле во близок контакт.
Со Мартин на масата, меѓу другите, седеле и претседателката на Претставничкиот дом Ненси Пелоси и пејачката Керол Кинг.
Маргарет Бренан од Си-би-ес њуз, која присуствувала на настанот, на Твитер напиша дека ирскиот амбасадор во САД, Ден Мулхол, на присутните им кажал дека премиерот Мартин е позитивен на ковид-19 и дека мора да го напушти настанот.
Мулхол додал дека премиерот се чувствува добро, пренесе „Ајриш тајмс“.
„Да, тој доби позитивен ПЦР-тест вечерва. Тој беше негативен претходно во текот на денот, како и во неделата пред патувањето“,
изјави портпаролот на премиерот.
Бајден многу ги цени своите ирски корени и за време на неговото обраќање зборуваше за силните врски меѓу САД и Ирска.
Мартин денеска требаше да учествува со Бајден на традиционалните свечености на Денот на свети Патрик во Белата куќа и на Капитол Хил.