Авторката на колумната се вика Адријана Акоста-Кортез, која себеси се опишува како 29-годишна здравствена администраторка од Еквадор која живее во северен Даблин, а текстот е придружен со нејзина наводна фотографија
„Ајриш тајмс“ (Irish Timesa) се извини за објавувањето колумна која се чини дека е делумно напишана од вештачка интелигенција (ВИ), во измама за која уредникот рече дека ги истакнува предизвиците со кои се соочува индустријата на весниците.
Руадан Мекормаик рече дека весникот искрено жали што коментарот со наслов „Ирската женска опсесија со лажен тен е проблематична“ бил објавен во четвртокот наутро.
„Сега се чини дека написот и придружната фотографија на авторката можеби биле произведени, барем делумно, користејќи генеративна ВИ-технологија. Тоа беше измама – личноста со која се допишувавме не беше она што таа тврдеше дека е. Станавме жртва на намерна и координирана измама“,
напиша вчера главниот уредник.
Авторката на колумната се вика Адријана Акоста-Кортез, која себеси се опишува како 29-годишна здравствена администраторка од Еквадор која живее во северен Даблин, а текстот е придружен со нејзина наводна фотографија.
Во написот се дискутирало за широката употреба на средства за лажни тен во Ирска. Во петокот попладне неколку луѓе на социјалните мрежи се запрашале дали се работи за вистинска личност проверувајќи ги фотографијата и името на авторката.
Потоа текстот беше отстранет и заменет со зборовите:
„Текстот на овој напис е отстранет додека се проверува“.
Во писмото на уредникот објавено вчера, Мекормаик рече дека весникот станал жртва на намерна измама.
„Тоа беше прекршување на довербата меѓу ‘Ајриш тајмс’ и неговите читатели и навистина ни е жал. Инцидентот го истакна неуспехот во нашите процедури пред објавувањето. Мораме да ги направиме понепропустливи – и ќе го направиме тоа“.
Мекормаик рече дека инцидентот истакнал еден од предизвиците што вештачката интелигенција ги поставува за медиумските куќи.
„Ние, како и другите, ќе научиме и ќе се адаптираме“,
додаде тој.
Тој напиша дека „Ајриш тајмс“ работи напорно за да произведе провокативни колумни кои „информираат, стимулираат и даваат нова перспектива за актуелните прашања“. Меѓутоа, во четвртокот весникот „страшно погрешил“, додаде тој.
„Објавивме онлајн колумна за мислење со наслов ‘Проблематична е опсесијата на жените од Ирска со лажен тен’, напишана од некој што се идентификуваше како млада имигрантка во Ирска… Во текот на неколку дена, ‘авторката’ соработуваше со редакцијата за да се разгледаат предлозите за промени, да се понудат лични анегдоти и да се обезбедат врски до релевантни истражувања. Сето ова беше земено со добра волја, а написот беше објавен на интернет во четвртокот наутро“,
изјави тој.
Мекормаик рече дека весникот дознал дека колумната можеби не е автентична помалку од 24 часа подоцна.