Конфликтот влезе во втората недела, а израелскиот премиер Бенјамин Нетанјаху најави дека војната против Иран ќе продолжи со сета сила, со план за отстранување на државното раководство откако минатата недела во заеднички американско-израелски напади беше убиен врховниот лидер ајатолах Али Хамнеи, што предизвика регионален конфликт
Иранската револуционерна гарда денеска соопшти дека вооружените сили на земјата би можеле да водат интензивна војна против САД и Израел најмалку шест месеци.
Конфликтот влезе во втората недела, а израелскиот премиер Бенјамин Нетанјаху најави дека војната против Иран ќе продолжи со сета сила, со план за отстранување на државното раководство откако минатата недела во заеднички американско-израелски напади беше убиен врховниот лидер ајатолах Али Хамнеи, што предизвика регионален конфликт.
И покрај заканите, Револуционерната гарда соопшти дека силите на Исламската Република можат да водат интензивна војна шест месеци со сегашното темпо на борбите.
Портпаролот на гардата Али Мохамад Наини изјави дека Иран досега користел ракети од прва и втора генерација, но дека во наредните денови ќе употреби напредни и поретко користени ракети со долг дострел.
Проширувањето на конфликтот и способноста на Иран да предизвика штета и жртви се потврди и со тоа што американскиот претседател Доналд Трамп присуствуваше на враќањето на телата на шест американски војници кои загинаа во напад со дрон врз американска база во Кувајт минатата недела.
Иранскиот шеф за безбедност Али Лариџани ја обвини администрацијата на Трамп дека се обидува да повтори сценарио слично на Венецуела, каде што беше соборен претседателот Николас Мадуро.
„Нивната процена беше дека ќе биде како Венецуела – ќе нападнат, ќе ја преземат контролата и ќе биде завршено. Но сега се во стапица“,
изјави тој во претходно снимено интервју емитувано на државната телевизија.
Шефот на иранското правосудство Голамхосеин Мохсени Еџеи, исто така, ги предупреди блискоисточните соседи кои „отворено и прикриено му стојат на располагање на непријателот“ дека тешките напади врз тие цели ќе продолжат.
Иранскиот претседател Масуд Пезешкијан денеска изјави дека Техеран ќе биде принуден да одговори доколку некоја соседна земја се искористи како појдовна точка за напад или обид за инвазија.
Техеран претходно се закани со напади врз американски цели во регионот.
Во самиот Иран штетата врз инфраструктурата и станбените области расте, додека жителите известуваат за зголемена вознемиреност и силно присуство на безбедносните сили.
Иранското Министерство за здравство во петокот соопшти дека најмалку 926 цивили се убиени, а околу 6 000 се ранети.
Нетанјаху изјави дека Израел постигнал речиси целосна контрола врз небото над иранската престолнина.
Аналитичарите предупредуваат дека сè уште нема јасен пат за завршување на конфликтот, за кој американски и израелски претставници велат дека би можел да трае еден месец или подолго.
Трамп предложи дека иранската економија би можела да се обнови доколку покојниот врховен лидер биде заменет со лидер прифатлив за Вашингтон, што Техеран го отфрли.