Трамп претходно го повика Иран да се откаже од каква било одмазда и рече дека владата во Техеран сега мора да склучи мир или идните напади ќе бидат многу поголеми, што поттикна загриженост од понатамошна ескалација на конфликтот на Блискиот Исток
Иран денеска им се закани на Соединетите Американски Држави (САД) дека по нивниот напад на нуклеарните постројки на земјата сега е проширен опсегот на легитимни цели што би можеле да бидат на удар на иранските вооружени сили.
Портпаролот на централниот воен штаб на Иран „Хатам ал Анбија“, Ебрахим Золфакари, во видеоизјава рече дека САД треба да очекуваат тешки последици за своите постапки и го нарече американскиот претседател Доналд Трамп „коцкар“ затоа што ги вклучил Соединетите Држави во воената кампања на Израел против Исламската Република.
„Господине Трамп, коцкару, можеби вие ја започнавте оваа војна, но ние ќе бидеме тие што ќе ја завршиме“,
вели Золфакари на крајот од снимената видео-изјава на англиски јазик, пренесе Ројтерс.
Во меѓувреме Иран и Израел продолжија со размена на оган додека светот е во исчекување дали и на каков начин Техеран ќе одговори на американскиот напад врз нуклеарните постројки на земјата, за кои Трамп изјави дека можат да доведат до соборување на владејачката структура во Иран.
Според анализите на експерти на кои се повикува Ројтерс, комерцијалните сателитски снимки покажуваат дека американскиот напад врз објектот во Фордоу, сместен длабоко под земја, сериозно ја оштетил или уништил постројката и центрифугите за збогатување ураниум, но засега нема потврда статусот и состојбата на објектот.
Американскиот претседател во своите последни коментари на социјалните мрежи изјави дека американскиот напад во саботата, нанел монументална штета на сите нуклеарни постројки во Иран.
„Уништување е вистинскиот термин! Најголемата штета се случила длабоко под нивото на земјата. Ударите беа силни и прецизни. Нашата војска покажа голема вештина. Пилотите на бомбардерите Б-2 штотуку слетаа безбедно во Мисури. Ви благодариме за добро завршената работа!“,
напиша тој на својата социјална платформа Трут соушл (Truth Social).
Трамп претходно го повика Иран да се откаже од каква било одмазда и рече дека владата во Техеран сега мора да склучи мир или идните напади ќе бидат многу поголеми, што поттикна загриженост од понатамошна ескалација на конфликтот на Блискиот Исток.
Во засебна објава, Трамп се осврна и на политичката состојба во Иран велејќи дека ако сегашниот режим не е во можност да го направи Иран повторно голем, тогаш неговата промена е неопходна.
„Не е политички коректно да се користи терминот ‘промена на режимот’, но ако сегашниот ирански режим не е во можност повторно да го направи Иран голем, зошто да не се случи промена на режимот? МИГА!“,
напиша Трамп користејќи го акронимот МИГА (Да го направиме Иран повторно голем), како алузија на акронимот МАГА (Да ја направиме Америка повторно голема), што беше слоганот на неговата претседателска кампања.
САД викендов лансираа 73 прецизно наведувани проектили, вклучувајќи т.н. бомби за уништување бункери и повеќе од дваесет ракети „томахавк“ врз три ирански нуклеарни постројки, изјави претседателот на Здружениот штаб на вооружените сили на САД, генералот Ден Кејн.
Меѓународната агенција за атомска енергија (МААЕ) на Обединетите нации соопшти дека не е пријавено зголемување на нивоата на зрачење надвор од локацијата по американските напади. Генералниот директор на агенцијата Рафаел Гроси за Си-ен-ен изјави сè уште не може да се процени штетата направена под земја.
Висок ирански извор за Ројтерс изјави дека поголемиот дел од високо збогатениот ураниум во Фордоу бил преместен на друго место пред нападот, наводи што агенцијата не може да ги потврди од независни извори.
Техеран, кој негира дека неговата нуклеарна програма не е насочена кон производство на нуклеарно оружје туку за цивилни цели, по нападите на САД лансираше серија ракети кон Израел ранувајќи десетици луѓе, а беа погодени и неколку згради во Тел Авив.
Засега нема конкретни дејствија на Иран во насока на напади врз американски бази или блокирање на 20 отсто од глобалните пратки на нафта што минуваат низ Ормутскиот Теснец.
Обидот за блокада на теснецот би можел да ги зголеми глобалните цени на нафтата, да ја попречи светската економија и да предизвика конфликт со огромната Петта флота на американската морнарица со седиште во блискиот Бахреин.