Спикерот Глаук Коњуфца ја прекинал денешната седница на Парламентарното претседателство откако шефот на неговиот кабинет бил цел на напад на шефот на ПГ на ЛДК, а во почетокот на расправата за надоместоците што, покрај платите, ги примаат пратениците
Претседателот на собранието на Косово, Глаук Коњуфца, ја одложи седницата на Парламентарното претседателство поради наводно насилно однесување на шефот на пратеничката група на опозицискиот Демократски сојуз на Косово (ЛДК), Арбен Гаши, на почетокот на состанокот, јави МИА.
Коњуфца изјави пред новинарите дека се обидел физички да го нападне шефот на неговиот кабинет, Илир Крчели, и изрекол тешки навреди кон него.
„Имаше напад, имаше и пцости. Беа изречени работи кои не можам да ги кажам тука“,
рече Коњуфца.
Тој најави дека се можни дисциплински мерки против шефот на пратеничката група на ЛДК и порача дека барањето до Гаши за извинување е најмалото нешто што може да се направи во овој случај.
„Денешната седница нема да се одржи поради заканите на шефот на ЛДК, Арбен Гаши, упатени кон мојот персонал. Тој јазик е неприфатлив. Изразите што ги употреби се неприфатливи. Вакви однесувања не смееме да прифатиме. Неговиот јазик беше скандалозен и многу навредлив, со пцости кон семејството“,
рече Коњуфца.
Инцидентот се случил на почетокот на седницата на Парламентарното претседателство, на која се отворила темата за дополнителните надоместоци, кои, покрај платите, ги примаат пратениците.
Деновиве во јавноста се појавија информации дека повеќе од половината косовски пратеници користеле високи надоместоци за патни трошоци за учество на пленарните и комисиските седници во собранието. Меѓу тие што земале стотици евра месечно најмногу има пратеници од владејачкото Движење самоопределување (ВВ) на премиерот Албин Курти, пренесува МИА
По истекувањето на информацијата, од ВВ, чиј потпретседател е Коњуфца, објавија дека сите нивни пратеници се откажуваат од таквите надоместоци и побараа и од другите партии да го сторат истото. Најавена е и иницијатива за измена на собранискиот деловник кој ги овозможува таквите надоместоци.