Полицијата употреби и солзавец за да ги растера верниците и членовите на „Фуркан“, кои се собраа во џамија, иако тоа во овој период не е дозволено со мерките за заштита од ковид-19
Поголем конфликт изби во една џамија во регионот Газиантеп, во југоисточниот дел на Турција, во кој учествуваа собрани верници, како и членови на фондацијата „Фуркан“, од една страна, и припадници на полициските сили, од друга страна.
Со оглед на тоа што во Турција моменто е во сила целосен карантин, кој, меѓу другото, опфаќа и забрана за собирање во затворен простор, членовите на организацијата „Фуркан“ изразија незадоволство од ваквата одлука на претседателот Реџеп Тајип Ердоган и неговата Партија на правдата и развојот (АКП).
Лидерите на организацијата сметаат дека забраната за собирање во џамии воедно подразбира и одземање на верските слободи.
Во знак на протест, членовите на организацијата се собраа на молитва во една од џамиите во Газиантеп, а лидерите на движењето истакнаа дека сите верници ќе го почитуваат растојанието и ќе носат маски во џамијата.
Сепак, многу брзо откако верниците се собраа, полициските сили влегоа во џамијата и им наредија на верниците да заминат. Бидејќи верниците и членовите на организацијата „Фуркан“ одбија да ја напуштат џамијата, дојде до конфликт меѓу двете страни, а безбедносните сили употребија и солзавец за да ја растераат толпата.
„Ова не е Израел, ова е Турција. Оние кои, и покрај епидемиолошките мерки, им дозволуваат на луѓето да се собираат на стадионите, во јавниот превоз и во компаниите, ги спречуваат верниците да се молат во џамии“,
велат од организацијата.
Фондацијата „Фуркан“ е позната во Турција по бројни политички ексцеси, а по најновиот инцидент, Алпарслан Кујтул, официјален претставник на организацијата, изјави дека ќе продолжи да инсистира на собири во џамиите.
Најригорозниот карантин во Турција започна на 29 април и ќе трае вкупно три недели. Како дел од новите епидемиолошки мерки, турските власти забранија и собири на верници во џамиите.