Претседателот на државата Стево Пендаровски во интервју за „Радио Слободна Европа“ се приклучи на повиците јавноста да прави разлика меѓу СЈО како институција и евентуалните злоуопотреби од одреден обвинител во врска со случајот „Рекет“. Според него, досегашната работата на СЈО во голема мера помогнала во напредокот кон НАТО и ЕУ интеграциите и тој факт не смее да биде поништен или заборавен.
„Институцијата СЈО беше клучната институција, освен преспанскиот договор, која ни ги отвори вратите и на НАТО и на ЕУ. Тоа ви го тврдам одговорно, затоа што бев преговарач во името на нашата земја, во однос на НАТО интеграциите, и знам дека најголемите позитивни коментари од сите реформи кои во изминативе две-три години ги направивме, беа на сметка на СЈО. На тоа што СЈО го направи. Значи, една работа е работата на институцијата СЈО до овој момент и постапките кои ги воделе различни обвинители, се разбира не само Катица Јанева. Сосема друга работа е овој последниот случај, кој јас ургирам и од оваа позиција, како и да се сфати, до надлежните органи да ја процесуираат што побрзо и што подлабоко, за да не остави ни најмала дамка на работата на институцијата како таква“
изјави претседателот Стево Пендаровски.
Претседателот беше прашан и дали ги нарушил преговарачките позиции на македонската страна во мешовитата комисија на историчари со Бугарија, со неговата изјава за Гоце Делчев која ја даде во емисијата „360 Степени“- дека револуционерот се декларирал како Бугарин, но се борел за самостојна и независна Македонија. Пендаровски објасни дека го направил сосема спротивното. Дал „ветер во грб“ на процесот кој во тој момент бил заглавен.
„Не е, туку напротив е засилување на преговарачката позиција од страна на еден од политичките фактори во нашата земја. Македонската јавност треба да знае дека комисијата од историчари составена од Македонија и Бугарија западна во ќор-сокак. Практично дојде до ситуација, дојде до периодот 19-20 век, во кој бугарската страна инсистираше, по мое убедување од политички мотиви, сè што се случувало во тој период да биде препишано само на бугарската историја и сите тие дејци, сите револуционери и сите настани да бидат дефинирани како исклучиво бугарски. Јас после една долга серија консултации, кои ги имав со академиците во нашата академија, со членовите на нашата комисија, со истакнати интелектуалци и професори по историја на наша страна, од нашата држава, заклучив дека е потребен извесен политички ветер во грб на нашата страна од комисијата и една политичка рамка да речам, не конечно или целосно решение, туку една политичка рамка во која идните разговори во рамки на таа комисија, евентуално можат да се одвиваат. Во спротивно добивавме чиста блокада, значи прашање беше на време кога до крајот на годината, освен она што го имавме со години од Атина, ќе добиевме чиста блокада кон ЕУ од Софија. Последната средба на комисијата во Скопје не беше продуктивна, има закажано следна средба во септември, во меѓувреме тие меѓу себе, членовите на комисијата имаат интензивна комуникација, циркулираат материјали во двете насоки во смисла да се најде заедничко стојалиште за тие работи и да дојдеме до она што е примарната цел на таа комисија да зборуваме за личности, не за сите, и да зборуваме за настани, не за сите настани во тие два века кои се споделени, не се само македонски, не се само бугарски, бидејќи целта е, повторувам, да видиме каде имаме споделена историја, не таа сторија да биде комплетно бугарска и ние од оваа страна само да потпишеме таква работа, бидејќи тоа не е целта на комисијата и што е поважно тоа не историски факт“,
одговори Пендаровски.
Во делот од разговорот за кадровските поместувања во Агенцијата за разузнавање, Пендаровски доби прашање и за обвинувањата од опозицијата, дека директорот на Агенцијата кој тој го постави прави чистка и штета на институцијата.
„Нема основ во таквите обвинувања, како што немаше основ и во првите обвинивуња за истиот човек, истиот директор од страна на ДУИ, ако ги паметите на самиот почеток од неговиот мандат. Со нив таа работа ја расчистивме во непосреден дијалог. Видовме дека зад нивните обвинувања или сомнежи дека нешто е можеби направено спротивно на закон, нема ништо. Во однос на овие последни обвинувања од главната опозициона партија, повторно велам дека нема ништо. Извршени се неколку десетина унапредувања и уназадувања на некои луѓе во Агенцијата за разузнавање, тоа е факт. Меѓутоа, оние што се уназадени се припадници на структурата во безбедносните сили која со години работеше против Македонија и која работеше против нашето асоцирање во НАТО. Станува збор само за тие луѓе. Она што сакам исто така да го нагласам, инаку не би кажувал кога не би бил прозван на ваков начин од главната опозициона партија, при овие последни унапредувања, унапредувања повторувам, не уназадаувања во Агенцијата, унапредени се и неколку членови на ВМРО-ДПМНЕ кои се одлични оперативци и кои во изминативе десетина години беа маргинализирани од оваа група претходна која ја споменав. Која наводно беше блиска со ВМРО-ДПМНЕ а фактички беше блиска со други центри на моќ и не работеше за македонските интереси“,
изјави претседателот Стево Пендаровски.
Целото интервју на претседателот Стево Пендаровски за „Радио Слободна Европа“ можете да го погледнето подолу.