Не помина обидот на опозицијата да го отстрани Талат Џафери од функцијата претседател на Собранието
Претседателот на Собранието, Талат Џафери, ја доби довербата од мнозинството пратеници за да продолжи да ја врши функцијата. Или попрецизно, опозицијата не обезбеди доволно гласови за интерпелација на собранискиот спикер.
На гласањето вечерва, по целодневна дебата, „против“ предлогот на опозицијата гласаа 61 пратеник, додека „за“ беа 43.
Интерпелацијата ја поднесе ВМРО-ДПМНЕ на крајот на минатиот месец. Пратениците од опозициската партија сметаат дека Талат Џафери треба да одговара пред граѓаните за својата работа. Го обвинуваат дека континуирано го прекршува Деловникот на Собранието и дека со тоа сторил огромна повреда на законодавниот дом.
Џафери, пак, обвини дека постојано е навредуван на лична основа од опозицијата, но и дека нема да дозволи дебатата да се спушти на такво ниво.
По неприфаќањето на интерпелацијата, пренесува МИА, претседателот на Собранието изјави дека ќе ја продолжи комуникацијата со сите пратеници.
„Без оглед на начинот на гласање, важно е што се нарушија тезите дека интерпелациите се држат во фиока. Ми останува да им се заблагодарам и на тие што гласаа за мое разрешување и на оние кои гласааа против мое разрешување. Како и да е, работата на законодавниот дом ќе продолжи, а граѓаните се оние што ќе ја направат проценката бидејќи никој од нас не е безгрешен. Ќе кажам дека со моите постапки нема да дозволам да се узурпира овој дом што им припаѓа на народот. Продолжува и комуникацијата со секој од вас“,
рече Џафери.