„Приведени се поранешен државен секретар на Министерството за економија, поранешен, мислам дека е и сегашен раководител на еден сектор во рамки на Министерството за економија, имаме приведено поранешен директор на Дирекција за заштита и спасување и тројца вработени во рамки на Дирекцијата. Дел од приведените кои се во Кочани се луѓе кои, како што напоменав, биле организатори на самиот настан. Дел биле вклучени во рамки на обезбедување, а дел биле вклучени во рамки на други активности што се случувале вечерта. Разговор од страна на полициските службеници со очевидци на настанот е извршен со 25 лица досега и континуирано ќе се продолжи со прибирање соодветни информации поврзани со кривичноправниот настан“, кажа министерот за внатрешни работи Панче Тошковски на прес-конференцијата која се одржа околу 15 часот и 30 минути
Во продолжение погледнете ја интегрално прес-конфренцијата на Тошковски и прочитајте го транскриптот од неа
Тошковски: Министерството за внатрешни работи во координација со Јавното обвинителство до овој момент во врска со овој кривично правен настан има осомничено повеќе од 20-тина лица. Околу 15 лица се во полициска станица. Дел од осомничените за предизвикување на овој кривичноправен настан се починати, согласно сомненијата што ги имаме досега од аспект на осомничени. Дел се во болница. Четири лица во моментов имаме обезбедени во болница. Два члена на бендот, син на сопственик на дискотека и управител на правното лице кое ја менаџирало дискотеката. Дел од приведените лица кои моментално се во полициска станица се луѓе кои имаат директна вина во врска со овој кривично правен настан, согласно доказите што досега ги имаме собрано. Приведено е едно лице кое е организатор на настанот и за кое имаме сомнение дека е еден од оние што имаат директна вина во рамки на стрување на конкретни кривични дела поврзани со овој настан. Исто така приведени се поранешен државен секретар на Министерството за економија, поранешен, мислам дека е и сегашен раководител на еден сектор во рамки на Министерството за економија, имаме приведено поранешен директор на Дирекција за заштита и спасување и тројца вработени во рамки на Дирекцијата. Дел од приведените кои се во Кочани се луѓе кои, како што напоменав, биле организатори на самиот настан. Дел биле вклучени во рамки на обезбедување, а дел биле вклучени во рамки на други активности што се случувале вечерта. Разговор од страна на полициските службеници со очевидци на настанот е извршен со 25 лица досега и континуирано ќе се продолжи со прибирање соодветни информации поврзани со кривичноправниот настан. Имаше прашања во врска со лиценцата итн. Легална лиценца за работа оваа фирма нема. Не би сакал да откривам повеќе детали во таа насока зашто сме во многу рана фаза во рамки на оваа истражна постапка, но сакам едно да кажам, а тоа е дека и оваа лиценца како и многу други работи во минатото во Македонија е поврзана со мито и корупција. И сакам да и напоменам на македонската јавност дека за разлика од претходно во овој случај имаат име и презиме тие што се вклучени директно во рамки на нелегалното издавање лиценци и ќе одговараат за тоа. Во однос на прашањата коишто ми ги поставивте претходно, досега се утврдени повредени повеќе од 20 малолетни лица и три починати малолетни лица. Во дискотеката имало некаде, согласно првичните информации коишто ги имаме, околу 500 лица. Некаде 250 карти се продадени, согласно информациите коишто ги имаме добиено. Имињата на починатите, по завршување на идентификација ќе бидат доставени до семејствата. Идентификувани се најголем број од починатите. Сите тела коишто беа во рамки на кривично-правниот настан се извадени од лице место. Во критична состојба имаме 22 лица. И дел од овие лица ќе бидат пренесени со авион дел во Турција, дел во Бугарија, дел во Грција и на истите ќе им биде даден соодветен третман за нивно лекување. Денес Македонија плаче, ама одговорност ќе има! За секој еден од корумпираните, неодговорните и секој еден којшто има директно или посредно влијание за настанување на овој кривично-правен настан. Овие информации коишто ги изнесов сега се за досега утврдената фактичка состојба којашто ја имаме, согласно досега собраните податоци. Ќе следат и други дејствија во текот на денешниот ден, во текот на утрешниот ден. Во координација со јавниот обвинител имавме состанок во текот на денешниот ден на два пати и во координација со сите оние обвинители коишто го зајакнаа бројот на обвинители во рамки на Кочани, се постапува и ќе ги преземеме сите дејствија за целосно, ама целосно и темелно расветлување и расчистување на се што е поврзано со овој кривично-правен настан. Одговорност мора да има и ќе има.
Прашање: Министре Тошковски, сега кажавте дека лиценцата била нелегална итн итн. Лиценцата ја добил во 2023 година со важење до 24.март 2024 година. Цела година дискотеката работела без лиценца, полицијата веројатно знаела и полицијата веројатно не презела дејствија и не ја затворила. Втора работа, не одговоривте на прашањето дали оваа фирма има сертификат за употреба и ракување со пиротехнички материјали којшто го издава МВР по комисија. Значи треба да полага тој за таа работа. И трета работа, како оваа дискотека работи после 1 часот, со оглед на тоа што треба да добие согласност од градоначалникот за да работи псоле 1 часот и зошто е дозволено дискотеката да се реновира цело лето, а сега гледаме дека градоначалникот е пастрахиран од било каква одговорност?
Тошковски: Ви благодарам на прашањата, ќе ве замолам како новинари, одговорни за соодветно информирање на јавноста, во вакви критични, ужасни моменти за македонската јавност, да не шпекулирате.
Прашање: Поставувам прашање, не шпекулирам.
Тошковски: Прашањето коешто го поставивте, во однос на лиценца издадена 2023 година е обид за манипулација. Не е таа лиценца којашто ја напоменав јас во мојот говор. Јас говорам за други две лиценци коишто ги имам овде коишто се издадени 2024 година. И коишто во најмала рака се фалсификувани лиценци. Затоа ви велам немојте да шпекулирате, осетлива е јавноста.
Прашање: Значи има друга лиценца?
Тошковски: Станува збор за нелегални лиценци коишто се издадени 2024 година. Овде имам две, тие се доказна постапка, не можам да ги споделам сега, не дека не сакам. Станува збор за лиценци коишто се нелегални, невистинити, фалсификувани, како сакате кажете ги кои се добиени, претпоставката е, постојат основни на сомнение на коруптивен начин.
Прашање: За тоа е приведена од економија државната секретарка?
Тошковски: Ги кажав сите факти кои требаше да ги кажам во форма која сметам дека сега нема да ја загрози истрагата понатаму. Ви кажав кои луѓе се приведени, кој тип на луѓе се осомничени за сторување на кривично дело за овој кривичен настан. Полицијата реагира и соодветно реагирала и во текот на вчерашниот ден, максимално реагираме колку што можеме за се што може да се стори како дејствие од аспект на соодветно обезбедување на теренот, помагање во делот на транспортирање на повредени најбрзо што можеше да се изреагира, хеликоптер беше активиран, сите тимови се донесени на полицијата во рамки на Скопје, на ЦУК, на сите кои се релевантни, се ангажирани на терен и даваме максимум од себе. Приведени се преку, ви кажам, осомничени имаме дваесетмина, го откриваме криминалот кој се таложел преку 30 години во оваа држава. Со криминал и корупција еве до што стигале и еве какви дејствија ние чувствуваме како граѓани во оваа држава
Прашање: А зошто не сте преземале мерки пред да се случи ова, вие сте година дена.
Тошковски: Ама ве замолувам сега. Немој да ја манипулирате јавноста.
Прашање: Јас поставувам легитимно прашање. Дали има промена на бројата на починати?
Тошковски: Бројката која ја имам досега е таа, 59.
Прашање: Против колку има потерница?
Тошковски: Оние 4 лица за кои беше распишана централна потерница се обезбедени, во тој момент немавме информација каде се. Овие лица се обезбедени во рамки на клиниките.
Прашање: Градоначалникот повикан е на сослушување, на разговор во полиција?
Тошковски: Значи согласно законските одредби кои досега ги анализиравме, надлежен за издавање на предметна дозвола во рамки на постапување е Министерство за економија, надлежен за се што е поврзано со самите услови кои треба да се исполнат, а е поврзано со пожарите е Дирекција за заштита и спасување. Секој еден друг за кој ќе утврдиме дека има соодветна незаконитост во постапувањето ќе постапиме како и за овие што постапивме до сега. Досега немаме утврдено никаква одговорност на градоначалникот, да факт е порано дека дозволата била издавана од страна на општините, но со последните измени на закон, дозволите се издаваат од Министерството за економија.
Прашање: За после еден часот работење ги издава градоначалникот. Според сомнежите ДЗС како постапувала или непостапувала, какви се сомнежите?
Тошковски: Станува збор за сомнежи во насока на пропуштање на должен надзор и во насока на непостапување согласно законски основи. Сега за сега тоа можам да го соопштам на јавноста.
Прашање: Споменавте резултат на корупција и фалсификат за лиценците, на големо се шпекулира во Кочани дека за една од лиценците е дадено 7 000 евра како мито, дали имате сознанија за некакви уплати?
Тошковски: Го кажав она што имав да го кажам, да точни се претпоставките согласно информациите кои ги имаме досега дека и во овој случај како и во други случаи имаме мито и корупција. Имаме основи за сомнение дека има мито и корупција и во овој случај, само сега ќе има име и презиме и одговорност.