Резултатите од компаративната анализа на Институтот за човекови права направена оваа недела врз основа на две истражувања покажуваат зголемување на нетолеранцијата, нетрпеливоста и социјалната дистанца кон лицата со различна сексуална ориентација и родов идентитет.
Институтот ваквите резултати ги добило по двете истражувања спроведени во периодот од април до октомври годинава за перцепцијата и ставовите на населението во земјава во однос на сексуалната ориентација и родовиот идентитет.
Во делот на тоа колку граѓаните сметаат дека ЛГБТ лицата не се воопшто дискриминирани, во април 17,5 отсто од граѓаните опфатени во истражувањето одговориле дека тие не се, додека во октомври тој број се искачил на 24,6%.
Во април 61,7 осто од граѓаните се изјасниле дека ја поддржуваат забраната на дискриминација врз основа на сексуална ориентација, за во октомври тој број да опадне на 49,3 отсто.
Процентот на испитаници кои манифестираат силно неодобрување во поглед на слободното декларирање на сопствената сексуална ориентација во април е 34,3 отсто, а во октомври тој е зголемен на 45,1 отсто.
Во периодот од шест месеци зголемен е и бројот на граѓани на Македонија кои сметаат дека хомосексуалноста е болест – во април тој процент бил 72,9, а во октомври е 80,2 отсто.
Единстевно намалување има кај процентот на испитаници кои до одреден степен одобруваат напади врз хомосексулаците и трансродовите лица – од 13% во април, на 12,5 отсто во октовмри.
Притоа, истражувањата покажале дека социоекономските фактори имаат големо влијание врз односот и прфаќањето на различни животни стилови: повисок степен на образование, живот во урбана средина и помала возраст е поврзана со повисока толеранција кон ЛГБТ заедницата.
Здружението на граѓани Институт за човекови права постои веќе 10 години. Во него членуваат Маргарита Цаца Николовска, судија на Уставниот суд во Босна и Херцеговина и поранешен судија на Европскиот суд за човекови права, Агим Мифтари и Вера Коцо, судии во Врховен суд на Р.Македонија во пензија,Вања Михајлова, поранешен член на Државна комисија за спречување на корупција, Коста Петровски, поранешен претседател на Здружение на јавни обвинители на РМ, Игор Спировски, адвокат, поранешен судија во Уставен суд на РМ и адвокатот Филип Медарски.