Контролата ја врши Државниот санитарен и здравствен инспекторат откако во неделата (2 јули 2023 г.) родилка се обиде да си го одземе животот неколку дена по породувањето
Раководството на болницата вчера одржа прес-конференција на која кажа дека родилката се жалела на вознемиреност по породувањето, но и дека била дадена стручна помош
Во тек е инспекциски надзор на Државниот санитарен и здравствен инспекторат на Универзитетската клиника за гинекологија и акушерство, јави МИА. Веста ја потврдија и од Министерството за здравство
„Комисијата е излезена на терен и во тек е надзорот за утврдување на фактичката состојба. По изготвување на извештајот од страна на ДСЗИ, јавноста навремено ќе биде информирана“,
соопштија од Министерството за здравство.
Информацијата, за МИА, ја потврдила и медицинската директорка на УК за гинекологија и акушерство, Викторија Јовановска.
„Пациентката е на КАРИЛ, бебето е тука, така замоли фамилијата. ДСЗИ се тука за да видат, да утврдат дали сѐ е направено така како што треба“,
изјави Јовановска за МИА.
Скопјанката која скокна од првиот кат на УК за гинекологија и акушерство е на возраст од 39 години. Детето што го родила на 28 јули, односно неколку дена пред да изврши обид за самоубиство ѝ е прва рожба.
Раководството на болницата вчера одржа и прес-конференција на која пред новинарите беше прочитана временската низа на настани, од тоа како била примена како итен случај и породена со царски рез на 28 јули, па сè до кобниот момент.
И медицинскиот и организацискиот директор на УК за гинекологија објаснија дека родилката пријавила вознемиреност по породувањето, но и дека би била овозможена целата помош, вклучувајќи разговор со клинички психолог.
„Секаде во светот е познат фактот дека 1 од 10 породени пациентки има некое мало психолошко нарушување, да не повредиме никој. Меѓутоа никаде прозорците не се забарикадирани и не се затворени. Не можеме ние да ги чуваме пациентките во затворен простор како да ни се затвореници“,
изјави Викторија Јовановска.
На понатамошните прашања на новинарите, Јовановска одби да каже дали пациентката имала претходни здравствени проблеми, како што објасни, на барање на семејството. Не даде повеќе детали и дали со пациентката стигнал да разговара психијатар, како што организацискиот директор прочита дека заклучиле на УК за гинекологија пред пациентката да биде пуштена дома.
„Тука пациентката немала некои посебни психички проблеми, освен што била лесно вознемирена, не сакала да го дои бебето, што не се случува првпат. Тоа е многу чест случај. И затоа разговаравме со директорот на Психијатрија и со неговите вработени, да направиме една заедничка средба, да може да доаѓа психијатар, меѓутоа тоа сепак е табу-тема и не знам како ќе го прифатат пациентките“,
изјави Јовановска.