Во март годинава Владата ја именуваше Менка Андреева за директорка на Инспекторатот, но регистрирањето на институцијата во Централниот регистар мора да почека на усогласување на Законот за употребата на македонскиот јазик со Законот за инспекциски надзор
Првпат во историјата се формира ваква институција која треба да стои во одбрана на македонскиот стандарден јазик, а причината поради која сè уште нема институција во вистинската смисла на зборот е расчекорот меѓу два закона – Законот за употребата на македонскиот јазик и Законот за инспекциски надзор – вели директорката на Инспекторатот за употребата на македонскиот јазик, Менка Андреева, во гостување во емисијата „360 степени” на МРТ 1.
Андреева вели дека во моментов, како директорка на Инспекторатот за употребата на македонскиот јазик, во координација со службите од Министерството за култура и туризам, работи на донесување на актите за формирање на институцијата. Но, додава таа, постојат административни пречки поради неусогласеноста помеѓу Законот за употребата на македонскиот јазик усвоен во јануари 2024 година, кој предвидува самостојност на Инспекторатот, и Законот за инспекциски надзор донесен во декември лани, според кој сите инспекторати се ставаат под надлежност на министерствата, што значи да немаат посебна буџетска сметка и да не бидат буџетски корисници од прв ред.
360°: Дали тоа го сметате за хендикеп?
Андреева: Па, во овој момент, не. Приоритет е да се усогласат овие два закона и да дојде до можност да го регистрираме Инспекторатот. Тоа ни одзема малку повеќе време, но секако мора да направиме така и да ги испочитуваме законите, да постапиме онака како што тие ни наложуваат.
360°: Измени треба да се направат во Законот за употребата на македонскиот јазик или…?
Андреева: Да, да. Во првичниот закон.
360°: Дали знаете во која фаза е подготовката на тие измени? Андреева: Многу скоро ќе бидат ставени на седница на Собранието.
За тоа дали Законот за употребата на македонскиот јазик ќе придонесе за подобрување на состојбите, професорот на Филолошкиот факултет „Блаже Конески“ при УКИМ, Симон Саздов, вели дека тој лично верува дека несомнено ќе биде од корист и оти е многу важно да се спроведе така како што е составен, со најдобра волја. Според него, не би требало да се стави акцент на казнувањето, туку да дејствува образовно и да им овозможи на тие што не го владеат македонскиот стандарден јазик на високо рамниште, да го направат тоа преку укажувања.
„Инаку, има многу детали кои внесуваат квалитативна промена според мене. Во минатото се лекторираа трудови, меѓутоа не стоеше името и презимето на лекторот секаде. Сега тоа е законска обврска и мислам дека конечно ќе се понесе личната одговорност за тоа што ни се случувало, наши трудови да бидат лекторирани на тендер, а таму добил некој со најниска понуда и се покажал како недоволно квалитетен лектор. Да речеме дека таму каде што немало грешки, што правел лекторот – ги изместил запирките, ама ги изместил толку нестручно што ние универзитетски професори излеговме многу неписмени. Почнува реченица, подмет и веднаш запирка. Така што верувам дека тоа сега нема да се случи, а и ако се случи, ќе има последици“,
вели Саздов.