Во Собранието не се констатирани неправилности. Мерките предвидени за заштита од ковид-19 се во целост обезбедени.
Ваков заклучок донел Државниот инспекторат за труд откако вчера бил во вонреден инспекциски надзор во Собранието.
Инспекторите вршеле увид во работните простории на Собранието односно канцелариите, салите, ходниците, лифтовите, помошните простории, влезовите и излезите.
Надзорот следува еден ден откако во законодавниот дом двајца пратеници од мнозинството кои се во изолација, дојдоа на работа за да обезбедат кворум за гласање, меѓудругото и за петтиот пакет економски мерки.
Од овие причини денеска опозициските ВМРО-ДПМНЕ и Левица поднесоа и кривични пријави за двајцата пратеници и претседателот на Собранието, Талат Џафери.
СДСМ, пак, ги оцени кривичните како неосновани и смета дека тоа е доказ оти овие партии не можат да се помират со фактот што по два месеци блокади и опструкции конечно се изгласала помошта за граѓаните.
„Присуството и гласањето на пратениците кои беа позитивни на ковид-19, а беа без симптоми и со целосна заштитна опрема, беше според посебен протокол за спроведување за гласање на пратеници кои се наоѓаат во домашна самоизолација“,
рекоа од СДСМ.