„Сега излегуваат и информации дека странски служби јавиле и тоа уште пред една година и дека безбедносната проценка воопшто не била направена од АНБ и од МВР. Само не кажаа која, дали српска или руска странска служба. Ако нема проценка од АНБ и МВР како Обвинителството донело одлука за куќен притвор? Ако нема проценка од АНБ и МВР, како што вели Мицкоски дека тоа било класифицирано, како тогаш се донело ваква одлука? Циркус“, рече портпаролката Кузеска на денешната прес-конференција
Се што досега кажаа премиерот Христијан Мицкоски и владејачката ВМРО-ДПМНЕ се покажа дека е голема лага, а театарот и режираното сценарио за случајот со ексвицепремиерот Артан Груби веќе стана циркус. Ова е денешната реакција што на прес-конференција ја соопшти портпаролката на опозицискиот Социјалдемократски сојуз (СДСМ), Богданка Кузеска, коментирајќи ја синоќешната изјава на премиерот Христијан Мицкоски дадена во телевизиско гостување дека побарал објаснување од Министерството за внатрешни работи (МВР) и Агенцијата за национална безбедност (АНБ) за проценките за безбедноста на ексвицепремиерот Артан Груби во истражниот затвор „Скопје“, од каде добил одговор дека станува збор за класифицирани, строго доверливи документи.
„Обвинителството под контрола на Мицкоски го правдаше скандалозното одредување куќен притвор за Груби со безбедносна проценка дадена од МВР и АНБ. Не бил безбеден и затоа морале да одредат куќен притвор. Истиот ден, директорот на затворот Шутка, инаку кадар на ВМРО-ОКГ го демантираше Обвинителството, велејќи дека ниту АНБ, ниту МВР не дошле и направиле проценка. Мицкоски вчера јавно на телевизија рече дека тоа биле каласифицирани информации, доверливи и не може да се соопшти. Имал чувство“,
вели Кузеска.
Сега, како што додаде, излегуваат и информации дека странски служби јавиле и тоа уште пред една година и дека безбедносната проценка воопшто не била направена од АНБ и од МВР.
„Само не кажаа која, дали српска или руска странска служба. Ако нема проценка од АНБ и МВР како Обвинителството донело одлука за куќен притвор? Ако нема проценка од АНБ и МВР, како што вели Мицкоски дека тоа било класифицирано, како тогаш се донело ваква одлука? Циркус“,
кажа таа на прес-конференцијата.
Според ова, додаде Кузеска, нема посилна потврда дека се е договорено и смислено, односно дека се измислуваат нови лаги, се прави дефокус да се прикрие сценариото и дилот што го направиле.
„Претстава на граница, доаѓање со наочари, со насмевка, само уште црвен килим недостасуваше. Пречек со камери, со медиумска поддршка на 40 отсто од медиумите под контрола на ВМРО преку Орбан. Одредувањето куќен притвор од обвинителство и судство по контрола на ВМРО ОКГ. Има, па нема безбедносна проценка. Дале проценка АНБ и МВР, па не дале. Сега странски служби. Недостасуваат уште ‘жолти комбиња‘ и сликата да биде комплетна. Циркус ‘Медрано‘ како што викаше Гордана Јанкуловска. Ова го разобличува целото режирано сценарио, целокупниот театар“,
рече портпаролката на СДСМ.
Посочи дека премиерот разрешува и поставува нови обвинители во живо на телевизија, а сега повторно најавува што ќе зборува Груби и што ќе прави Обвинителството.
„Кому веќе не му е јасно дека Мицкоски, покрај тоа што уредува 40 отсто од медиумите што преку Орбан ги има под контрола, управува и со Обвинителството? Се е договорено, граѓаните не се глуви и слепи, знаат се. Имаме чувство Мицкоски“,
рече на крајот од прес-конференцијата Кузеска.
Премиерот Христијан Мицкоски во телевизско гостување вчера рече дека побарал објаснување од МВР и АНБ за проценките за безбедноста на Груби во истражниот затвор „Скопје“, а одговорот што го добил е дека станува збор за класифицирани, строго доверливи документи.
„Разговаравме. Тоа се класифицирани, строго доверливи документи, до кои нема пристап директорот на затворот ‘Скопје‘“,
рече тој.
Според него, не значи дека куќниот притвор нема да биде заменет со ефективен.
Мицкоски рече и дека има чувство оти во овој момент многу луѓе се загрижени и дека оттука произлегува и немирот кај опозицијата.
За обвинувањата од лидерот на СДСМ дека постои политички договор меѓу власта и ДУИ, но и дека не се плашат од сведочењето на Груби, премиерот рече дека тој и јавноста ќе го држат за збор Филипче, надевајќи се дека потоа тој нема да говори за политички реваншизам.
„Но, кога ќе дојде до тој момент, а имам чувство дека ќе дојде, да не биде дека е политички реваншизам или нешто друго. Да не биде после тоа како за модуларната ‘јас не сум виновен‘, како од едно во друго министерство се движи тој проект, па како се случува и слично. Да не биде дека еве, некој политички му се реваншира. Тоа е суштината кај СДСМ и нивните прокси ботови, исплашени се од тоа што ќе следи“,
рече тој.
Откако Груби во понеделникот и се предаде на полицијата и му беше одреден куќен притвор, од СДСМ со денови обвинуваат дека зад случајот има политички договор и сценарио меѓу ВМРО-ДПМНЕ и Демократската унија за интеграција (ДУИ).