Како што информираат од владејачката партија, членовите на ИК, потегот на Таравари го оцениле како уште еден доказ дека групата заштитници на криминалот и корупцијата добива нови редови
Извршниот комитет на ВМРО-ДПМНЕ на денешната седница го овластила лидерот на партијата и премиер Христијан Мицкоски да предложи нови кадровски решенија на позициите што досега ѝ припаѓаа на Алијансата за Албанците, по одлуката на Арбен Таравари да ја напушти владината коалиција.
Како што информираат од владејачката партија, членовите на ИК, потегот на Таравари го оцениле како уште еден доказ дека групата заштитници на криминалот и корупцијата добива нови редови.
„Уште една маска падна, уште една илузија беше разоткриена. На политичката сцена се појави нов, добро координиран марионетски квартет: СДС, Алијанса, ДУИ и Левица – различни имиња, но ист газда. Различни маски, но ист сценарист. ДУИ со години инвестираше во создавање на лажни политички конкуренти кои всушност се негови продолжени раце. Така ги добивме СДС и Алијансата на Таравари – партии со речиси идентичен рејтинг, подготвени да бидат потрошени во функција на обидот за враќање на ДУИ на власт. И како што е случај со секоја потрошена роба, така и овие ќе бидат фрлени на политички отпад кога ќе ја завршат својата задача“,
се наведува во соопштението на ВМРО-ДПМНЕ.
Оттаму нагласуваат дека државата не оди во провалија.
„Од провалијата ја вадиме. А тоа што ги боли е фактот што веќе нема амнестии, нема рекети, нема наместени тендери. Боли што правдата конечно тропа на нивната врата. На крајот, нека викаат колку сакаат. СДС, ДУИ и нивните политички вазали веќе се осудени – од граѓаните на изборите. А вистинскиот суд – оној на правдата – допрва доаѓа“,
порачаа од владејачката партија.
По синоќешното официјално соопштение на Арбен Таравари дека неговото крило на Алијанса за Албанците (АА) излегува од владината коалиција, од Владата денеска информираа дека нема да има реконструкција на Владата, туку само смена на министрите.
Алијанса за Албанците на Таравари во актуелната Влада има две министерски места, односно ресорот здравство, што го води самиот Таравари, и вицепремиерската позиција за добро владеење, на која во моментов се наоѓа Арбен Фетаи. Во Собранието, пак, ова крило на Алијанса има пет пратеници.