Досега на Клиниката за детски болести тринаесет деца од истото училиште побарале медицинска помош, а четири се уште се хоспитализирани
Целосно се завршени анализите на мострите од вода земени од ОУ „Димо Хаџи Димов“ и физичко-хемиската анализа, како и микробиолошката анализа на водата се во рамките на реферетните вредности, информира Институтот за јавно здравје. Тешки метали, како што соопшти ИЈЗ, во мострите од вода не се пронајдени.
Анализите покажале присуство на норовирус кај шест деца.
„Како што претходно известивме за резултатите од мостри од храна и работни површини од истоименото училиште, најдени се фекални бактерии Enterobacteriaceа во мусаката и на неколку површини од кујната и училиштето кои укажуваат на нехигиена во училиштето и кујната. Од добиените седум примероци на биолошки материјал кои ги имаме примено во Институтот за јавно здравје од деца кои јавиле симптоми, шест се позитивни на Norovirus,“,
соопшти ИЈЗ.
За дополнително пристигнатите мостри од другите девет училишта, ИЈЗ ќе информира во понеделник.
„ИЈЗ е во постојана комуникација со другите надлежни институтиции и за сите дополнителни инфромации ќе ја информира јавноста,“
се наведува во соопштението од ИЈЗ.
Досега на Клиниката за детски болести тринаесет деца од истото училиште побарале медицинска помош, а четири се уште се хоспитализирани, но се во добра здравствена сосотојба, изјави за Канал 5, директорот на Детската клиника, Реџеп Мемеди.
„Со иста клиничка слика и слична симптоматологија, во смисла на стомачна болка, повраќање , дијареа и температура кај некои. Седум од нив беа задржани на болнички третман, по добиената медицинска нега беа во добра, стабилна здравствена состојба, три од нив вчера беа пуштени дома, значи во добра општа состојба, задржани се уште четири деца кои продолжуваат со болнички третман, да видиме до понеделник и откако ќе бидат во потполно добра општа состојба, ќе бидат пуштени.“
вели Реџеп Мемеди, директор на Клиниката за детски болести.
Вчера директорката на ИЈЗ, Марија Андоновска кажа дека бактерии од групата Enterobacteriaceae се пронајдени на чешмите и во храната што ја консумирале децата од кујната во Основното општинско училиште „Димо Хаџи Димов“.
„Од брисевите од оние работни површини – од кваките, од чешмите, од садовите од коишто јаделе и од пултот, можам да кажам дека од девет земени површини три се веќе позитивни, т.е. позитивни се рачните чешми од две одделенија и една чешма во кујната. На овие површини се најдени бактерии од групата Enterobacteriaceae, тоа се грам негативни бактерии кои можат да дадат ваква симптоматологија како што покажува клиничката слика кај веќе заболените. Значи, тие можат да дадат ваква клиничка слика, што укажува на нехигиена“,
рече Андоновска.
Инспекциски служби на Институтот за јавно здравје (ИЈЗ), Агенцијата за храна и ветеринарство (АХВ) и Државниот санитарен и здравствен инспекторат (ДСЗИ) спроведоа вонреден инспекциски надзор во Основното општинско училиште „Димо Хаџи Димов“ во скопско Влае, Општина Карпош поради сомнежи за труење, откако повеќе ученици од училиштето побарале лекарска помош поради стомачни тегоби, дијареа и повраќање.