Во текот на истата недела, пријавен е и еден смртен случај асоциран со грип
Од 17 до 23 февруари годинава се пријавени 3 035 случаи на заболени од грип, што е за 11,3 отсто повеќе во споредба со претходната недела, кога имало 2 726 случаи, информираат од Институтот за јавно здравје (ИЈЗ).
Тоа значи дека за една недела бројот на регистрирани случаи со грип пораснал за 309.
Во текот на истата недела е пријавен и еден смртен случај асоциран со грип.
„Се работи за лице на возраст од 78 години од Скопје, кое било хоспитализирано на Клиниката за пулмоалергологија, а лабораториски е потврдена Инфлуенца А. Кај него е утврдено присуство на коморбидитети и не било вакцинирано против сезонски грип“,
се вели во соопштението од Институтот.
Од новозаболените, 1 697 лица се на возраст од 15 до 64 години. Деца на возраст од пет до 14 години има 712 случаи, а 375 се деца до четири години. Над 65 години се 251 лице.
Оттаму додаваат и дека бројот на пријавени случаи со грип оваа, споредено со истата недела минатата година е зголемен за 3,7 пати.
Вкупниот број случаи со грип во сезоната 2024/2025 година изнесува 17 375.
Споредено со истиот период од минатата сезона, бројот на пријавени случаи е зголемен за 36,4 отсто, а во однос на последните 14 сезони се регистрира зголемување од 12,3 отсто.
Досега се регистрирани три починати лица асоцирани со грип.
Според ИЈЗ, вакцинацијата против сезонски грип е најефикасна заштита од ова заболување. Заклучно со минатата недела, вакцинирани се вкупно 72 293 лица со бесплатна или комерцијална вакцина против сезонски грип.