Генерално, од почетокот на сезоната на грип до денеска, како што кажа директорката на ИЈЗ, Андоновска, вкупниот број на заболени изнесува 3 825 лица, што е за 2,8 пати повеќе во споредба со истиот период лани, кога биле регистрирани 1 335 случаи
Прашана дали поради пикот што се очекува во втората половина на јануари ИЈЗ би можел да препорача одложување на почетокот на второто полугодие од школската година, Андоновска кажа дека тие како Институт ја следат состојбата и доколку оценат дека бројот на заболени е превисок, може да дадат таква препорака, но на другите надлежни институции, односно на Министерството за образование и наука е да донесе одлука
Зголемување на бројот на заболени од грип и заболувања слични на грип се бележат во првата недела од новата година, а сезонскиот пик на новозаболени надлежните го очекуваат во втората половина на овој и првата половина на следниот месец.
За состојбите со грипот во земјава денеска на прес-конференција информира в.д. директорката на Институтот за јавно здравје (ИЈЗ), Марија Андоновска, која ги сподели податоците собрани од Центрите за јавно здравје.
А тие, како што кажа таа, покажуваат дека во периодот од 29 декември 2025 година до 4 јануари 2026 година се пријавени 1 725 случаи на групни пријави на заболени од грип и заболувања слични на грип, што е за 2,2 пати повеќе во споредба со неделата претходно, кога бројката на пријавени случаи изнесувала 771 заболен.
Споредено со истата недела од минатата сезона, бројот на заболени од грип, според Андоновска, е зголемен за 5,2 пати, односно лани во овој период имало пријавени вкупно 331 случај, додека пак, споредбата со последните 15 сезони покажува дека бројот на заболени е зголемен за 38,7 проценти.
Како што наведе директорката на ИЈЗ, пријавената инциденца, односно бројот на заболени од грип и заболувања слични на грип е над неделната граница на средна активност на вирусот на национално ниво.
Според возраста, најголем дел од заболените лица или 749 се од возрасната група помеѓу 15 и 64 години, потоа 618 се деца на возраст од пет до 14 години, 229 од заболените се деца на возраст од нула до четири години и 129 лица се на возраст над 65 години.
„Највисока инциденца е регистрирана кај децата на возраст од 5 до 14 години“,
изјави директорката на ИЈЗ.
Според добиените податоци, најмногу случаи на заболени од грип и заболувања слични на грип се регистрирани во Скопје, вкупо 716, во Тетово има 339 заболени, Куманово – 150, Велес – 109, Штип – 60, Дебар – 54, Гостивар – 49, Прилеп – 45, Охрид – 44, Битола – 40 и Струмица – 38.
Во другите градови, како Кавадарци, Неготино, Струга, Демир Хисар, Виница, Македонски Брод и Радовиш, бројот на заболени е помал од 30.
Според Андоновска, многу висока активност на грипот се бележи во Дебар, Велес и во Тетово, додека во Скопје, Куманово и во Штип станува збор за средна активност на вирусот.
„Во 10 единици се бележи сезонска регуларна активност, додека во две единици, како што се Радовиш и Демир Хисар се бележи многу ниска активност на вирусот на грип“,
рече директорката на ИЈЗ.
Генерално, од почетокот на сезоната на грип до денеска, како што кажа Андоновска, вкупниот број на заболени изнесува 3 825 лица, што е за 2,8 пати повеќе во споредба со истиот период лани, кога биле регистрирани 1 335 случаи.
„Во однос на моделот од послендите 15 сезони, вкупно се регистрира зголемување од 20,6 проценти“,
наведе таа.
Она што е засега добро, е што во досегашниот тек од почетокот на сезоната не се регистрирани починати лица како последица на компликации поврзани со грипот.
„Како епидемиолошки коментар можеме да издвоиме дека се забележува значително зголемување на бројот и инциденцата на заболувања слични на грип на неделно ниво. Во текот на првата недела од 2026 година за првпат во сезоната е регистирана средна активност на грипот на национално ниво. Согласно овие податоци, во Македонија имаме висок интензитет на вирусот на грип со очекување за натамошно зголемување во наредниот период“,
изјави Андоновска.
Сепак, како што кажа таа, ваквата ситуација не е нешто ново, имајќи предвид дека се наоѓаме среде период на празници со многу прослави и собири на луѓе, што го зголемува ризикот од трансмисија на вирусот.
Пикот, како што наведе таа, се очекува да биде во втората половина од овој и првата половина од седниот месец, што соодветствува со почетокот на второто полугодие од школската година.
„Со враќањето на децата во училиште очекуваме дека и бројот на лица коишто ќе бидат заболени од грип или заболувања слични на грип може да биде зголемен“,
кажа Андоновска.
Од мерките за превенција, директорката на ИЈЗ рече дека тие постојано апелираат граѓаните да се придржуваат до општите насоки, кои иако, како што кажа, изгледаат вообичаено, доколку се практикуваат, значително ќе го намалат ризикот од заболувања и ќе превенираат компликации.
„Институтот за јавно здравје постојано алармира оние коишто не се заболени да избегнуваат колку што е можно некакви собири или да престојуваат во простории или трговски центри каде што има голем број луѓе, да избегнуваат контакт со веќе заболени лица или со оние што ќе пројават некакви симптоми на кивање и кашлање. Често да се мијат раце со обичен сапун и вода, да се проветруваат просториите, да се почитуваат здрави животни навики – редовна хидратација со течности, односно вода, лесна храна, витамини, минерали. Тоа се општите препораки што ги даваме. Да, навистина тие се општи, но е докажано дека доколку се практикуваат, со нив сепак се намалува ризикот од заболувања и, нормално, се превенираат компликации“,
појасни директорката на ИЈЗ.
Што се однесува до лицата кај кои веќе е констатирано дека се заболени од грип, препораките се пред сè да се јават кај својот матичен лекар и да останат дома да мируваат и да примаат симптоматска терапија препишана од лекар. Останувањето дома, потенцира Андоновска, е многу важно за да не се изложат на ризик лицата што не се заболени, особено децата и поворзасните над 65 години, како и и хронично болните, кои се поранливи на компликации од болеста.
„Секако, кај разичните категории граѓани, оние што се над 65 години, кај децата, кај бремените жени, кај хронично болните, доколку има влошување – да се јават кај својот матичен лекар“,
рече Андоновска.
Одоговарајќи на новинарски прашања, таа рече дека типот на грип кој циркуликра во земјава е Инфлуенца А.
Прашана дали поради пикот што се очекува во втората половина на јануари ИЈЗ би можел да препорача одложување на почетокот на второто полугодие од школската година, Андоновска кажа дека тие како Институт ја следат состојбата и доколку оценат дека бројот на заболени е превисок, може да дадат таква препорака, но на другите надлежни институции, односно на Министерството за образование и наука е да донесе одлука.
„Ние сега забележуваме дека има зголемување, но тоа е, според нас, очекувано во овој период. Секако како Институт ќе продолжиме да бележиме дали има пораст во иднина и на неделно ниво да известуваме. Доколку оцениме дека бројките се превисоки, ние можеме да дадеме препорака да се донесе некаква мерка. Секако доколку го забележиме тоа, ќе превенираме, барем ќе дадеме препорака, а понатака ќе видиме што ќе биде одлучено“, кажа директорката на ИЈЗ.