ИЈЗ предлага и разгледување на можноста за потенцијално работење онлајн, флексибилно работно време, двократно работење или надополнување на изгубеното работно време. Строго се препорачува избегнување на работа на отворено во периодот од 11 до 17 часот, почести паузи и постојана достапност на течности и електролити
Поради најавата од Управата за хидрометеоролошки работи за очекувани повисоки максимални дневни температури од утре до 27 јуни, Институтот за јавно здравје (ИЈЗ) попладнево издаде апел за засилено почитување на мерките за заштита на здравјето на општата популација, со посебен акцент на ранливите групи на население во услови на високи амбиентални температури.
ИЈЗ посочува дека во ранливи категории спаѓаат лицата кои работат во надворешни услови и се поизложени на влијанието на топлотните бранови, како и оние кои работат на работни места изложени на висока температура и топлинско зрачење или пак губат премногу течности за време на работата. Тука се вклучени градежни работници, земјоделци, сообраќајна полиција, доставувачи и други.
За работодавачите, ИЈЗ издаде низа препораки за заштита на работниците од високи температури. Тие вклучуваат редовно проверување и одржување на техничко-технолошки мерки како вентилација и климатизација, редовно мерење на амбиенталната температура и поставување на работните станици подалеку од сончева светлина и извори на топлина.
Препорака има и за обезбедување минимум една климатизирана просторија која ќе функционира како „засолниште“, каде што вработените ќе можат да се разладуваат во текот на работниот ден.
ИЈЗ предлага и разгледување на можноста за потенцијално работење онлајн, флексибилно работно време, двократно работење или надополнување на изгубеното работно време. Строго се препорачува избегнување на работа на отворено во периодот од 11 до 17 часот, почести паузи и постојана достапност на течности и електролити. Други препораки вклучуваат ротација на работните задачи, преместување на работниците во постудени простории кога е тоа можно, обезбедување поголем број работници по потреба, намалување на интензитетот на работата и нормите, и избегнување на прекувремена работа.
Посебна внимателност се бара кон ранливите групи вработени како постари работници, хронично болни, лица со зголемена телесна тежина и бремени жени, со нивно прераспределување на работни места соодветни за нивната состојба. Неопходно е и обезбедување соодветни лични заштитни средства, дозволување нивно отстранување за време на паузите и надзор при работа со хемикалии поради зголемена опасност од интоксикација.
За вработените, ИЈЗ препорачува урамнотежена исхрана, внесување минимум два литра вода дневно, избегнување алкохол и кофеин, и внесување електролити при засилено потење. Важни се и редовниот одмор, доволно спиење, туширање, носење лесна, светла и памучна облека, заштитни очила за сонце, капи и крем со УВ фактор 30+ при работа на отворено. Клучно е и препознавањето на симптомите на топлотен удар – вртоглавица, замор, вознемиреност, повраќање – и будност за состојбата на колегите.
ИЈЗ нагласува дека не смее да се дозволи на вработен со симптоми на топлинска болест да го напушти работното место пред да се стабилизира, односно да добие соодветен третман.
Во случај на симптоми на топлотен удар, препораките за прва помош вклучуваат веднаш да се повика 194 или 112, лицето да се префрли во разладена просторија, да легне хоризонтално со подигнати нозе, да се лади со ладни облози и прскање со вода, да не се дава терапија додека не пристигне лекарска помош, а ако е во бессознание, да се постави во странична положба.
Вонредните прегледи се спроведуваат од страна на специјалист по медицина на трудот за ранливите категории, со цел индивидуализиран пристап за работоспособноста на вработениот во дадените услови и консултации со матичниот лекар за терапијата или потребата од боледувања.
ИЈЗ потсетува дека и натаму е неопходно почитување на општите препораки за заштита на населението од топлотните бранови.