Градските власти на Сан Франциско вчера ја отстранија статуата на Христофор Колумбо, откако италијанскиот истражувач стана мета на демонстрантите против расизмот и неговото име се најде на листата на симболи на угнетувањето во САД.
Статуата тешка два тона, која беше подигната во 1957 година, вчера беше демонтирана по налог на градскиот совет, откако беше мета на протести и вандализам во последните години, објави „Сан Франциско кроникл“.
Претставничката на градските власти Кетрин Стефани го нарече отстранувањето на статуата „неопходен чекор“ и рече дека споменикот ги претставува „болните темели“ од историјата на земјата.
„Ропството, потчинетоста и освојувањето што сите ние мора да ги осудиме… статуата претставувала измислена пригодна верзија од нашата историја, славејќи го човекот додека ја игнорирал траумата што ја предизвикале неговите дела“,
напиша Стефани на својот твитер-профил.
Минатата недела во градот Бостон беше обезглавена статуата на Колумбо. Друг споменик беше запален и фрлен во езеро во државата Вирџинија.
Масовните протести против полициското насилство и системскиот расизам во САД доведоа до преиспитување на историјата и демонстрантите бараат отстранување на сите симболи кои го глорифицираат угнетувањето на Афроамериканците или другите малцински групи во земјата.
Колумбо беше еден од првите Европејци во новиот свет и честопати се нарекува откривач на Америка. Историчарите и активистите за граѓански права, сепак, го критикуваат Колумбо поради поробувањето на домородните Американци.
„Отстранувањето на статуата не е заради бришење на историјата. Станува збор за покажување љубов кон нашите пријатели и соседи кои страдаат во овој момент, кон заедниците кои со векови страдаат“,
напиша Стефани на Твитер.