Според Фаучи, и покрај тоа што британските студии покажуваат дека омикрон „носи“ полесна клиничка слика за заболените, ова нема да значи ништо зашто болниците повторно би се оптовариле поради многу поголемиот број заразени
Омикрон може да предизвика помала стапка на заболување од другите видови коронавирус, но бранот на болеста што го придружува ширењето на новиот вид сè уште се заканува да ги оптовари болниците во САД, изјави Ентони Фаучи, главен лекар за заразни болести во САД.
Во интервју за телевизијата Еј-би-си, тој ги наведе британските истражувања, според кои варијантата омикрон се карактеризира со „помалку хоспитализации, пократок престој во болница и помала потреба од терапија со кислород“.
„Но, не треба да бидеме поспокојни… Ако многу, многу повеќе луѓе се разболат, тоа би можело да ги поништи позитивните ефекти од намалувањето на тежината на болеста“,
рече Фаучи.
Варијантата омикрон е доминантна во САД и веќе доведе до остар скок на бројот на заболени. Според Фаучи, просечниот број случаи минатата недела достигнал 150 000 на ден и веројатно ќе се зголеми многу повеќе по празниците.