Спротивно на традиционалните економски теории, турскиот претседател Ердоган смета дека високите каматни стапки ја стимулираат инфлацијата и најави дополнително намалување на катните стапки во земјата
И покрај високата инфлација во Турција која во мај достигна 73,5 отсто на годишно ниво, турскиот претседател Реџеп Таип Ердоган денеска изјави дека сака повторно да ги намали каматните стапки.
„Никој да не го очекува тоа од нас. Оваа влада нема да ги зголеми каматните стапки. Напротив, ќе продолжиме да ги намалуваме“,
рече Ердоган на прес-конференција по владиниот состанок.
Спротивно на традиционалните економски теории, турскиот претседател смета дека високите каматни стапки ја стимулираат инфлацијата.
На крајот на 2021 година, Ердоган ја принуди централната банка да ја намали каматната стапка од 19 отсто на 14 отсто од септември и декември истата година, што предизвика колапс на националната валута.
Инфлацијата во Турција во мај достигна 73,5 отсто на годишно ниво, што е најмногу од декември 1998 година, а е поттикната од растот на цените на енергенсите и храната, покажуваат неодамнешните официјални бројки.