„Силно сме фокусирани кон стандарди за подобар живот на граѓаните. Таа борба продолжува“, порача премиерот во објава на Фејсбук
Премиерот Христијан Мицкоски попладнево преку својот фејсбук-профил информира дека со својот владин тим одржал состанок за реформската агенда. Во кусата објава, тој пишува дека и покрај наметнатиот билатерален спор, алудирајќи на спорот со соседна Бугарија, борбата за критериумите на Европската Унија и натаму продолжува.
„Силно сме фокусирани кон стандарди за подобар живот на граѓаните. Таа борба продолжува“,
пишува Мицкоски во објавата на Фејсбук.
Во врска со одржаниот владин состанок на Фејсбук се огласи и министерот за европски прашања Орхан Муртезани кој порача дека работата за интеграција на земјава во ЕУ продолжува со засилен интензитет.
„Заедно со министри и претставници на различни институции го проверивме напредокот во имплементацијата на Реформската агенда. Многу работа и позитивни резултати што заслужуваат поздравување“,
порача Муртезани.
Инаку, спроведувањето на законите од рефомската агенда би била една од темите на евентуалната лидерска средба на парламентарните политички партии на која пред неколку дена повика премиерот Христијан Мицкоски.
Во однос на поканата за лидерска средба, претседателот на СДСМ, Венко Филипче, вчера изјави дека нема да седне на иста маса со премиерот дури и ако тема на дискусија се реформските закони. Дискусијата за нив, како што рече, ќе се води во парламентот, каде рече дека СДСМ ќе ги поддржи сите реформски закони.