Пожарот во Општина Сарај, кај село Раовиќ, кој го гасат специјалци на МВР и седум француски експерти за пожари, веќе осми ден не може да биде изгаснат, соопштија на попладневната прес-конференција од Центарот за управување со кризи (ЦУК), од каде што посочија дека гори мешана шума.
Во гасење на овој пожар учествуваат и 50 припадници на специјалните единици на МВР, помогнати од седум француски експерти за пожари, кои биле префрлени на сртот на кањонот Матка со полициски хеликоптер и извршиле комплетн пребарување и догасување на постојните жаришта. Денеска во 14 часот, како поддршка, се приклучил и црногорски хеликоптер со 12 налета испуштајќи поголема количина на вода, но, како што велат од ЦУК, запрепастува фактот дека и покрај осумдневното гасење, утврдено е повторно потпалување, односно тлеење.
„Самото тоа не дозволува целосно ликвидирање на пожарот“, рече на прес-конференција портпаролката на ЦУК, Надица В’чкова, и додаде дека во неколку наврати денеска се дејствувало и од воздух со хеликоптер на МВР.
Пожарот на отворен простор помеѓу селата Барово и Вешје е целосно ставен под контрола, информираат од ЦУК, исклучиво сртот кој ги двои двете села сѐ уште покажува активност, но денеска околу 16:30 Главниот штаб при ЦУК одлучил да прати хеликоптер и да исфрли вода на непристапниот срт, а луѓето што се распоредени околу сртот да извршат целосно догасување.
Според ЦУК, пожар што избувна вчера во село Горно Мелничани, во Општина Центар Жупа, денеска бил ставен под контрола, но повторно се активирал околу 13 часот.
„Со оглед на исклучително тешката состојба со пожарот во Центар Жупа, главниот штаб на ЦУК донесе заклучок за утре од 8 часот да се активираат два хеликоптери, 40 припадници на АРМ, 30 припадници на специјалните полициски сили, 15 припадници на Национални шуми, како и две територијални противпожарни единици и еден тим на Дирекцијата за заштита и спасување да помогнат во справувањето и ставањето под контрола“,
рече В’чкова.
Од ЦУК велат дека е ставен под контрола и пожарот кај планинарскиот дом Китка, во околина на село Црвена Вода, а локализиран е пожарот во местото Кормина близу село Емирица кај Кратово. Утринава е појавен пожар во местото Круша, Гевгелиско, кој е ставен под контрола. Таму сѐ уште се на терен екипи од Шумско стопанство „Кожув“, а изгорени се два хектари квалитетна борова шума.