Заев вчера им се заблагодари на коалициските партнери за искажаните ставови и порача дека со тоа се разобличиле сите дезинформации за наводни нови мнозинства
И Партијата за движење на Турците (ТХП), предводена од пратеникот Енес Ибрахим, останува дел од владејачкото мнозинство. Во соопштение до медиумите, од ТХП наведуваат дека по завршувањето на првиот круг од локалните избори ќе се посветат на изборни активности и во пресрет на вториот круг и нагласуваат дека без калкулации остануваат дел од власта.
„Како единствена прогресивна партија на турската заедница во Северна Македонија, остануваме доследни на нашите политички определби, кои се темелат на демократските вредности и принципи. Здравата иднина на нашата земја, како и општата благосостојба на граѓаните секогаш биле и ќе останат приоритет на ТХП. Со таа цел, без никакви калкулации, остануваме дел од владиното мнозинство и веруваме дека со повеќе напори ќе успееме да ги коригираме недостатоците и ќе ги оправдаме очекувањата на граѓаните“,
велат од ТХП.
Токму со оваа партија, минатата зима социјалдемократите имаа превирања на локално ниво, поточно во Радовиш, каде од ТХП го напуштија мнозинството во општинскиот совет. Иако тогаш имаше информации дека тоа може да ја разниша и коалицијата на централно ниво, за што ТХП закажа и конгрес, сепак, партијата одлучи да остане во коалицијата со СДСМ.
Партијата за движење на Турците е последна од низата помали коалициски партнери кои од вчера една по една се изјаснија дека остануваат дел од владејачкото мнозинство. НСДП, ЛДП, ДОМ, ВМРО-Народна партија, Демократската партија на Турците, ДПА, Беса, беа само дел од владините партнери кои вчера го кажаа својот став.
- НСДП: Остануваме дел од владејачката коалиција
- ДПТМ: Владината коалиција е стабилна
- ДОМ и ЛДП нема да дадат јавна поддршка за други кандидати, но остануваат во мнозинството
- Османи: По изборите, очекуваме проширување на мнозинството
- И Беса и ДПА ѝ остануваат верни на владината коалиција
Од најголемиот коалициски партнер на СДСМ, ДУИ, пак, вчера порачаа дека коалицијата е стабилна, како и дека очекуваат зголемување на мнозинството.
„Нема ниту ново парламентарно мнозинство ниту потреба од предвремени парламентарни избори. Владината коалиција е стабилна, а по изборите очекуваме парламентарното мнозинство да се прошири“,
рече Османи.
Лидерот на СДСМ, Зоран Заев, вчера исто така се огласи и им се заблагодари на партиите.
„Се разобличија сите дезинформации кои ги слушавме претходните денови за наводни нови мнозинства. Денеска имаме јасна потврда, имаме владино мнозинство и коалиција која е стабилна и го води нашето општество напред“,
рече на вчерашната прес-конференција.