Митева утрово порача дека избори во овој момент не се добро решение, но смета и дека е потребна нова влада, а не да остане истата
Партијата Има таков народ (ИТН) на Слави Трифонов, кој вчера објави дека излегува од владата во Бугарија, би се обидела да формира нова влада со широка коалиција доколку го добие мандатот во свои раце.
Ваквата опција ја најави пратеничката од ИТН, Ива Митева.
„Ако дојде до нас мандатот, ќе се обидеме. Ќе бараме влада со широка согласност“,
рече Митева за бугарската Нова ТВ.
Таа смета дека избори во овој момент не се добро решение, но смета и дека е потребна нова влада, а не да остане истата.
„Ако сакавме овој премиер (Кирил Петков н.з.) да остане, немаше да ги повлечеме нашите министри. Имаме проблем во саката влада, со премиерот и вицепремиерот. Затоа ги повлековме нашите министри. Уморни сме од тоа коалицискиот совет да не прави ништо“,
рече Митева.
Има таков народ беше еден од четирите коалициски партнери кои досега ја сочинуваа владата. Преостанатите три беа Продолжуваме со промените, од чии редови е и премиерот Кирил Петков, како и Бугарската социјалистичка партија (БСП) и Демократска Бугарија.
Трите партнери синоќа одржаа состанок и без да соопштат многу детали по завршувањето на средбата порачаа дека нема да дозволат нови избори.
Пред состанокот, пак, Петков и лидерката на БСП ја споменаа и опцијата за формирање малцинска влада. Премиерот вчера имаше и интервју за БТВ во кое кажа дека се надева и на поддршка од барем 12 од вкупно 25 пратеници од ИТН кои евентуално би се премислиле, би станале независни и би ја поддржале неговата коалиција.
Бројката од 12 пратеници е таа што недостасува за сега веќе тројната коалиција да го има апсолутното мнозинство од 121 пратеник во парламентот со оглед дека трите партии, со излегување на ИТН, остануваат со 109.