Во случај на влошување на епидемиолошката состојба, МОН по проценка на Комисијата за заразни болести, за реализација на наставата има две резервни сценарија со кои ќе се заштити и зачува здравјето на учениците и наставниот кадар, вели Филипче
Општина Струга, како и Општина Кичево бараат да се одложи стартот на учебната година, бидејќи состојбата со ковид-19 во овие градови е полоша во однос на минатата година.
Од Општина Струга информираат дека на денешниот состанок донеле одлука да побараат одложување на почетокот на учебната година – наместо на 1 септември да започне на 20 септември. Претходно, со слично барање излезе и кичевскиот градоначалник, Фатмир Дехари, кој побара или одложување на почетокот или учебната година да стартува со онлајн-настава.
„Состојбата е полоша од претходната година за што се утврди дека почетокот на учебната година е потребно да биде пролонгиран, односно во Струга наместо на 1 септември да започне на 20 септември. Според добиените информации од надлежните, на секое наредно дневно тестирање, каде обично се прават 100 до 120 тестови дневно, секој четврти резултат е позитивен на ковид-19, а денес се хоспитализирани 35 лица во општата болница во Струга, седум во Завод за нефрологија, а во Здравствениот дом во Вевчани 120 лица се на нега во домашни услови, додека во Струга на домашна нега се 70 лица“,
велат од Општина Струга.
Додаваат дека на предлозите за почнување на наставата со далечинско учење, директорите на основните, а и средните училишта потенцирале дека во моментов не се подготвени за таков вид настава, особено средното стручно училиште.
„Од тие причини, поврзани со епидемиолошката состојба во Струга, а и моменталните организациски услови во училиштата, при што доколку би имало настава учениците би биле во постојан контакт, особено на големите одмори каде заеднички се дружат, купуваат храна и го користат транспортот оние ученици кои патуваат од руралните средини што би било од негативно значење за нивното и здравјато на наставниот кадар. За таа цел се поднесе барање до Влада на РСМ, Министерство за образование и наука, Министерство за здравство и Комисија за заразни болести за пролонгирање на почетокот на учебната година во општина Струга“,
известуваат од Општина Струга.
Министерката заобразование и наука, Мила Царовска, на денешниот онлајн-состанок со директорите на средните училишта во државата ги прецизирала финалните подготовки со цел успешен старт на учебната година, која согласно одлука на Владата, а на предлог на МОН и на препорака на Комисијата за заштита од заразни болести, ќе започне на 1 септември со настава со физичко присуство на учениците.
„Задоволна сум што оваа година сите училишта подготвителните активности ги почнаа порано од вообичаеното во изминатите години и што одговорноста е подигната на значително повисоко ниво, заради остварување на заедничката цел, а тоа е да обезбедиме квалитетна настава за учениците и при тоа да го заштитиме нивното, а со тоа и да придонесеме кон заштита на јавното здравје. За учениците, нема подобра алтернатива од настава во училница. Така ќе стекнат повеќе и поквалитетни знаења, а интеракцијата со врсниците и со наставниците е од големо значење за нивната социјализација и правилен психофизички раст и развој“,
рече Царовска.
Министерот за здравство, Венко Филипче, вели дека здравјето на учениците е приоритет, како физичкото така и менталното. Според него, учебната година започнува со настава со физичко присуство со слични протоколи како и во земјите во регинот.
„Наставата ќе се одвива под јасно утврдени здравствени протоколи. Во случај на влошување на епидемиолошката состојба, МОН по проценка на Комисијата за заразни болести, за реализација на наставата има две резервни сценарија со кои ќе се заштити и зачува здравјето на учениците и наставниот кадар“,
напиша Филипче на својот профил на Фејсбук.
Тој посочи дека во Србија наставниот процес ќе започне редовно, на 1 септември, часовите ќе траат по 45 минути, со полн капацитет на училниците, а учениците ќе носат маски само додека одговараат, додека вакцинираните наставници нема да бидат обврзани да носат заштитна маска, се додека одржуваат соодветно растојание од учениците.
„Протоколот подготвен од бугарското Министерството за образование предвидува маските во училниците да бидат задолжителни за сите ученици во основно образование, доколку се наоѓаат во епидемиолошки ризична средина, односно област во жолта, црвена или темно црвена зона. Границата за преминување на онлајн-настава ќе биде доколку 10 отсто од учениците се заразени. Во Хрватска, планот за одржување на наставата ќе се настојува да се одвива целосно во училниците. Хрватскиот завод за јавно здравство препорача вакцинација на деца постари од 12 години со хронични болести, за оние кои во семејството имаат таков член, за постарите средношколци и оние кои учат во здравствена, угостителска, туристичка насока и услужни дејности“,
додаде Филипче.
Тој апелира до родителите на децата што одат во училиште и градинка да се вакцинираат, за да го заштитат семејството од ширење на болеста.