Поради улогата на оваа земја во руската инвазија на Украина, и Велика Британија, која излезе од ЕУ, објави дека воведува санкции
Европската Унија (ЕУ) денеска воведе нови санкции против Белорусија поради нејзината улога во руската инвазија врз Украина, соопшти француското претседателство со Советот на ЕУ.
„Корепер (Комисијата на постојани претставници) штотуку одобри санкции против белоруски функционери и воен персонал вклучени во руската агресија врз Украина“,
соопшти француското претседателство.
Санкциите се насочени кон некои економски сектори, вклучувајќи го и извозот на дрво, челик и поташа, калиум карбонат што се користи како ѓубриво во земјоделството.
Европската Унија ги воведе првите санкции против Белорусија во 2020 година по насилното задушување на протестите во земјата. Во август 2020 година луѓето во Белорусија масовно протестираа против резултатот од претседателските избори за кои сметаа дека се наместени.
Поради улогата на оваа земја во руската инвазија на Украина, и Велика Британија, која излезе од ЕУ, објави дека воведува санкции.
Шефицата на дипломатија Лиз Трас изјави дека се воведени санкции за поединци и организации поради улогата на Белорусија во руската инвазија на Украина.
Режимот на Лукашенко, рече таа, активно ја помага и ја поддржува илегалната инвазија на Русија врз Украина и ќе ги почувствува економските последици од поддршката на Путин.