Во пожарот во кој синоќа изгореа бараки на Јавното претпријатие „Улици и патишта“, според неофицијални информации, бил зафатен и автомобилот на обвинителот Гаврил Бубевски, кој беше дел и од Специјалното јавно обвинителство (СЈО).
Неговото возило било паркирано до автомобилот во кој првично настанал пожарот.
Во МВР случајот бил пријавен утрово во 1:15 часот.
„На 22.12.2021 околу 1:15 часот во СВР Скопје било пријавено дека на улица ’Стефан Јакимов Дедов‘ настанал пожар во патничко возило ’нисан‘, со скопски регистарски ознаки, сопственост на Н.Л. (38) од Скопје. Од пожарот делумно било зафатено и патничко возило ’шкода‘, со скопски регистарски ознаки, сопственост на Г.Б. (45) од Скопје и бараките на ЈП ’Улици и патишта‘ кои биле целосно опожарени. Од екипа на Бригадата за противпожарна заштита Скопје пожарот бил локализиран, а повредени лица нема. Увид ќе се врши во текот на денот“,
велат од МВР.
Според информациите што претходно ги соопштија од Противпожарната бригада на Град Скопје, пожарот го гаснеле 19 пожарникари со шест возила. Штетата сè уште се утврдува.