Уставниот суд веќе формира предмет по иницијативите на Алијанса за Албанците предводена од Зијадин Села и од Илир Пачуку во кои се оспоруваат измените на Законот за прекршоци, во делот кој се однесува на воспоставувањето и функционирањето на електронскиот систем „Безбеден град“ за надзор во сообраќајот
И Алијанса за Албанците предводена од Арбен Таравари поднесе иницијатива до Уставниот суд со која се оспорува уставноста на измените на Законот за прекршоци. На два дена пред стартот на системот „Безбеден град“, ова е трета иницијатива со која се оспорува уставноста на законот.
Уставниот суд веќе формира предмет по иницијативите на Алијанса за Албанците предводена од Зијадин Села и од Илир Пачуку во кои се оспоруваат измените на Законот за прекршоци, во делот кој се однесува на воспоставувањето и функционирањето на електронскиот систем за надзор во сообраќајот, познати како „Безбеден град“.
Пратеникот Халил Снопче рече дека го оспоруваат Законот во делот на нееднаквата примена на системот „Безбеден град“ бидејќи тој ќе се спроведува само во Скопје, Куманово и Тетово, како и на Коридорите 8 и 10, а не и на целата територија на земјава.
Иницијативата, како што вели, ја поднеле денеска бидејќи чекале Законот за прекршоци и официјално да стапи во сила.
„Членот 9 од Уставот гарантира еднаквост на сите граѓани. Примената само во три града не нуди еднаквост на граѓаните“,
кажа Снопче.
Според АА на Таравари, секој закон мора да биде правичен, еднаков и да обезбеди исти права за сите граѓани, без исклучок.
Зијадин Села од Алијанса за Албанците на 26 јануари до Уставниот суд поднесе иницијатива за оценување на уставноста на Законот за прекршоци.
Според Села, Законот кој директно влијае и ги засега сите граѓани требало да биде предложен од Владата и да биде предмет на широка јавна расправа наместо да биде предложен од пратеници и да се носи по скратена постапка.
Укажа дека Законот не предвидува пораките кои „Безбеден град“ ги испраќа до граѓаните за сторен прекршок да се двојазични, односно се испраќаат само на македонски јазик. Со тоа, како што рече, се прекршува Законот за употреба на јазиците. Во оваа смисла Села забележа дека е несериозно казните да пристигнуваат преку порака бидејќи не постои законска обврска граѓаните да имаат мобилен телефон или електронска пошта.
За Илир Пачуку е спорно тоа што овој систем за надзор на сообраќајот се применува само на териториите на градовите Скопје, Куманово и Тетово, а не на целата држава.
Подносителот, исто така, тврди дека идентични сообраќајни прекршоци во одредени градови се санкционираат автоматски преку електронски систем, додека во други делови од територијата на државата не подлежат на ист степен на контрола и санкционирање.
Измените на Законот за прекршоци беше донесен со двотретинско мнозинство, односно за него на 23 јануари во Собранието „за“ гласаа 81 пратеник, 19 беа „против“, а воздржани немаше. За носење на измените на овој Закон не беше потребно Бадентерово мнозинство.
Двотретинското мнозинство го овозможи пратеничката група на Левица, која уште претходно најави дека ќе ги поддржи законските измени, што ги предложија пратеници од владејачкото мнозинство.
Координаторите на двете Алијанси за Албанците, и таа на Арбен Таравари и на Зијадин Села, како и на „Европскиот фронт“ и на Социјалдемократскиот сојуз (СДСМ) се изјаснија дека ќе гласаат против измените на Законот за прекршоците.
