Како причина за ублажување на заштитните мерки се наведува севкупната состојба и падот на бројот на новозаразени и хоспитализирани во последниот месец
Хрватска планира значително да ги ублажи епидемиолошките мерки за спречување на ширење на инфекцијата со коронавирус до претстојниот Велигден, кој во оваа земја се слави според грегоријанскиот календар.
На ниво на Националниот штаб за цивилна заштита и епидемиолозите во моментов се разговара за ублажување на мерките, кои би значеле укинување на ограничувањата за работното време и потврдата за сите места и настани, освен во системот на здравствена и социјална заштита, пишуваат хрватските медиуми.
Неофицијално се разговара за речиси целосно укинување на мерките поврзани со ограничување на бројот на лица кои можат да престојуваат внатре и надвор, јавува Танјуг.
Сертификатите за ковид ќе бидат укинати, но мерките на границите ќе останат како досега, согласно одлуките на Европската Унија.
Во Хрватска носењето маски е задолжително во затворени простории, а со новата мерка тие би можеле да станат само препорака, освен во одредени области како транспорт, кина и театри.
Како причина за ублажување на заштитните мерки се наведува севкупната состојба и падот на бројот на новозаразени и хоспитализирани во последниот месец.