Со влегувањето на холандскиот фонд, велат од клиниката, „Жан Митрев“ ќе прерасне во регионален медицински центар. Познатиот кардиохирург, според договореното, и понатаму ќе ја предводи целата операција на трансформација на клиниката во регионален центар
Холандскиот фонд „Балкан алајанс хелткер“ (Balkan Alliance Healthcare) ќе стане сопственик на мнозински удел во приватната болница „Жан Митрев“, основана и раководена од познатиот кардиохирург.
Од Комисијата за заштита на конкуренцијата објавија дека до нив е доставено известување дека холандскиот фонд планира да стапи во стратегиско партнерство со клиниката.
„’Балкан алајанс келткер БВ’, друштво основано согласно регулативата на Холандија, со седиште на улица ’Стравинскилан‘ бр. 1421, 1077ХХ, Амстердам, Холандија, во рамките на својата инвестициска политика има намера да стапи во стратегиско партнерство со Приватната здравствена установа – Клиничка болница ’Жан Митрев‘ Скопје со седиште на ул. ’Бледски Договор‘ бр. 8, 1000 Скопје, преку стекнување контрола со купување на мнозински удел, согласно одредбите од Законот за установите и Законот за здравствената заштита“,
пишува во документот од Комисијата објавен на веб-страницата пред пет дена (15 јуни).
Врз основа на прелиминарното испитување, потенцираат оттаму, утврдено е дека предметната концентрација може да потпадне под одредбите на Законот за заштита од конкуренција, но сепак конечната одлука по ова прашање е резервирана. Од Комисијата ги повикуваат заинтересираните трети страни да достават забелешки и мислења во рок од 10 дена.
Паралелно со ширењето на веста од утрово се огласија и од приватната клиника наведувајќи дека се во финални преговори за стратегиско партнерство. Преговорите, како што велат, се однесуваат за влез на холандскиот фонд како партнер во клиниката, што ќе овозможи приватната болница да ги прошири своите дејности и да ги подигне на повисоко ниво стандардите во медицината во земјава.
„Ова стратегиско партнерство е поддршка на веќе започнатиот проект за прераснување на клиниката ’Жан Митрев‘ во регионален медицински центар. На овој начин стануваме финансиски помоќни за да растеме побрзо и да се развиеме во вистински регионален центар за здравствени услуги со највисоки стандарди. Според договореното, доктор Жан Митрев, како и досега така и понатаму, ќе ја предводи целата операција на трансформација на клиниката во регионален центар каде што учат и се развиваат и нови кадри на лекари во делот на кардиохирургијата и другите дејности. Ќе се овозможи и поголема соработка со експерти од странство, а нашето знаење ќе биде искористено за медицинските центри во сопственост на холандскиот фонд, што значи проширување на дејноста на клиниката ‘Жан Митрев’ на регионално ниво“,
велат од клиниката „Жан Митрев“.
Покрај објавената писмена изјава, од клиниката наведуваат и кој е холандскиот фонд што веројатно ќе стане мнозински сопственик, при што потенцираат дека тој е формиран во 2006 година од страна на повеќе европски и американски инвестициски фондови. Вредноста на фондот во моментов изнесува 320 милиони американски долари, а предводен е од двајца бизнисмени Дејвид Лајл Метјусон и Андреј Кристијан Крикливи, кои имаат историја во инвестициите во здравствениот сектор, телекомуникациите, медиумите и финансиските услуги.
Во делот на здравствениот сектор, велат од клиниката, имаат свои инвестиции во Албанија, Косово, каде што поседуваат шест медицински центри. Во планот за регионално проширување, пак, покрај Македонија, се и: Србија, Бугарија, Хрватска, Турција и Романија.