Холандија денеска соопшти дека привремено, до 7 април, ја прекинува употребата на вакцините на „АстраЗенека“ против ковид-19.
Министерството за здравство соопшти дека привремено ја прекинува вакцинацијата на лицата на возраст до 60 години, но по консултации со здравствената служба денеска одлучи да ја прекине вакцинацијата за сите возрасни групи со оваа вакцина, пренесе Хина.
Во следните денови околу 700 лица, постари од 60 години, требаше да ја примат вакцината „АстраЗенека“, но нивната вакцинација, исто така, е привремено откажана.
По вакцинацијата се појавиле пет случаи на згрутчување на крвта, кај жени на возраст од 25 до 65 години, а едно лице починало. Во тек се истраги за утврдување дали случаите биле предизвикани од вакцинацијата, соопштија здравствените власти.
Во Холандија досега со вакцините на „АстраЗенека“ се имунизирани околу 400 000 лица.