Хирургот по извршена операција на жолчно ќесе врз пациентка, индиректно, преку сведок, побарал од синот на пациентката да му даде пари во износ од 150 евра за да се почестел за извршената работа. Синот следниот ден во просториите на болницата, во плик, му дал на осомничениот три банкноти од по 50 евра и откако докторот ги примил му бил извршен претрес при што парите биле најдени и одземени, а докторот бил приведен
Шеесет и четиригодишен хирург од клиничката болница во Битола е приведен и се сомничи дека сторил кривично дело примање поткуп.
Хирургот М.С., како што информираат од Министерството за внатрешни работи (МВР), на 27 овој месец, откако извршил хируршка интервенција, побарал 150 евра за да се почести за завршената работа.
Од МВР велат дека на хирургот му биле дадени побараните пари, но пред тоа тие биле обележани.
За случајот денеска информираа и од Основното јавно обвинителство (ОЈО) Битола од каде што велат дека е доставен предлог до судија на претходна постапка да биде определен притвор бидејќи според Обвинителството, постоеле околности што укажуваат на тоа дека лицето може да биде во бегство.
Во описот на случајот од Обвинителството се вели дека осомничениот парите ги побарал индиректно, преку сведок.
„Осомничениот, на 27 јануари, како доктор – хирург на Одделението за хирургија при ЈЗУ Клиничка болница ’Д-р Трифун Пановски’ Битола, извршил интервенција – операција на жолчно ќесе врз пациентка, а потоа индиректно, преку сведок, побарал од синот на пациентката да му даде пари во износ од 150 евра за да се почестел за извршената работа. Синот следниот ден во просториите на болницата, во плик му дал на осомничениот три банкноти од по 50 евра. Откако осомничениот ги примил, му бил извршен претрес и овластени службени лица од СВР Битола ги пронашле и одзеле парите“,
се вели во соопштението од ОЈО Битола.